ព័ត៌មានអន្ដរជាតិ

អ៊ីរ៉ង់ទន់ភ្លន់ជាមួយជប៉ុន ដោយបើកឱ្យនាវាជប៉ុនគ្រប់ប្រភេទឆ្លងកាត់ច្រក Hormuz

បានផុស

២ ខែ មុន

នៅ

ថ្ងៃអាទិត្យ ២២ មីនា ២០២៦

ដោយ

រដ្ឋមន្ត្រីការបរទេសអ៊ីរ៉ង់ លោក Abbas Araqchi បានឱ្យដឹងថា អ៊ីរ៉ង់ត្រៀមខ្លួនរួចជាស្រេច ដើម្បីអនុញ្ញាតឱ្យនាវាគ្រប់ប្រភេទរបស់ជប៉ុនអាចបើកឆ្លងកាត់ច្រកសមុទ្រ Hormuz ដែលជាសរសៃឈាមដ៏សំខាន់សម្រាប់ការផ្គត់ផ្គង់ប្រេងសកល។

សារព័ត៌មានជប៉ុន Kyodo បានផ្សាយថា លោក Araqchi បានប្រាប់ទីភ្នាក់ងារសារព័ត៌មានជប៉ុនក្នុងបទសម្ភាសន៍តាមទូរស័ព្ទថា៖«ទីក្រុងតេហេរ៉ង់បានចាប់ផ្តើមការចរចាជាមួយទីក្រុងតូក្យូ និងជាមួយរដ្ឋមន្ត្រីការបរទេស លោក Toshimitsu Motegi ពីការបើកច្រកសមុទ្រនេះសម្រាប់ជប៉ុនផងដែរ»។

រដ្ឋមន្ត្រីការបរទេសអ៊ីរ៉ង់ លោក Abbas Araqchi ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីបែបណា ក្រសួងការបរទេស និងពាណិជ្ជកម្ម រួមទាំងការិយាល័យនាយករដ្ឋមន្ត្រី មិនបានលើកទូរស័ព្ទពីទីភ្នាក់ងារសារព័ត៌មានរ៉យទ័រ កាលពីថ្ងៃសៅរ៍ ទី២១ ខែមីនា ដើម្បីស្នើសុំការអត្ថាធិប្បាយលើបញ្ហានៅឡើយទេ។

លោក Araqchi ប្រាប់សារព័ត៌មាន Kyodo ថា៖«ជាការពិតណាស់! អ៊ីរ៉ង់បានត្រៀមខ្លួនរួចជាស្រេច ដើម្បីគាំទ្រដល់នាវាជប៉ុនក្នុងការឆ្លងកាត់ តាមរយៈច្រកសមុទ្រ Hormuz ប្រសិនបើជប៉ុនស្វែងរកការបើកច្រកនេះឡើងវិញ»។

ប្រទេសជប៉ុន បាននាំចូលប្រេងនិងឧស្ម័នរាវជាង៩០ភាគរយ តាមរយៈច្រកសមុទ្រនេះ។ ការកើនឡើងនៃតម្លៃប្រេងសកលបានកើតឡើង ចាប់តាំងពីសង្រ្គាមអ៊ីរ៉ង់ ដែលរងការវាយប្រហារដោយសហរដ្ឋអាមេរិកនិងអ៊ីស្រាអែលនៅថ្ងៃទី ២៨ ខែកុម្ភៈ ចំណែកសង្គ្រាមឈានចូលដល់សប្តាហ៍ទី៤ កាលពីថ្ងៃសៅរ៍ ម្សិលមិញ។

មិនតែប៉ុណ្ណោះ នាយករដ្ឋមន្រ្តីជប៉ុន លោកស្រី សាណាអេ តាកាអ៊ិឈិ ប្រាប់អ្នកយកព័ត៌មាន បន្ទាប់ពីកិច្ចប្រជុំកំពូលនៅទីក្រុងវ៉ាស៊ីនតោន ថា លោកស្រីបានជម្រាបជូន លោក ត្រាំ ពីការគាំទ្រដែលជប៉ុនអាចជួយបាន និងមិនបានក្នុងច្រកសមុទ្រនេះក្រោមច្បាប់របស់ប្រទេសជប៉ុនប៉ុណ្ណោះ។

ត្រឡប់ទៅ លោក Araqchi ជាអតីតឯកអគ្គរដ្ឋទូតអ៊ីរ៉ង់ប្រចាំប្រទេសជប៉ុនពីឆ្នាំ២០០៨ ដល់ ២០១១ ថ្លែងថាទីក្រុងតូក្យូគឺមានទំនាក់ទំនងល្អជាមួយទីក្រុងតេហេរ៉ង់តាំងពីដើម។

លោកបន្តថា ប្រទេសអ៊ីរង់សង្ឃឹមយ៉ាងមុតមាំថា ខ្លួននឹងដើរតួនាទីក្នុងការបញ្ចប់ជម្លោះ ដែលជាការឈ្លានពានមិនសមហេតុផល និងខុសច្បាប់លើប្រទេសនេះ៕

ប្រែសម្រួល៖ ណឺ មិនា