មន្រ្តីជំនាញដាក់ផែនការសង្គ្រោះបន្ទាន់ប្រាសាទព្រះវិហារ ក្រោយយោធាថៃទម្លាក់គ្រាប់បែក បំផ្លាញបេតិកភណ្ឌពិភពលោក

ប្រាសាទព្រះវិហារដែលជាសម្បត្តិបេតិកភណ្ឌពិភពលោក ប៉ុន្តែរងការខូតខាតយ៉ាងទ្រុឌទ្រោមដោយក្រុមយោធាថៃទម្លាក់គ្រាប់បែកក្នុងចេតនាបំផ្លាញចោលនាពេលកន្លងទៅនេះ ត្រូវបានមន្រ្តីជំនាញកម្ពុជាដាក់ចេញនូវផែនការសង្គ្រោះអភិរក្សបន្ទាន់នៅទីតាំងដែលរងការហានិភ័យខ្ពស់។

នៅថ្ងៃទី ០២ ខែមេសានេះ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ ប្រធានក្រុមប្រឹក្សាភិបាលអាជ្ញាធរជាតិព្រះវិហារ បានដឹកនាំកិច្ចប្រជុំក្រុមប្រឹក្សាភិបាល អាណត្តិទី៥ លើកទី៦ ដើម្បីពិនិត្យវឌ្ឍនភាពការងាររមណីយដ្ឋានបេតិកភណ្ឌពិភពលោកប្រាសាទព្រះវិហារ និងប្រាសាទកោះកេរ។

កិច្ចប្រជុំនេះ បានពិនិត្យរបៀបវារៈសំខាន់ៗចំនួន៥ រួមមាន ១-របាយការណ៍អនុវត្តអនុសាសន៍ក្រុមប្រឹក្សាភិបាលអាជ្ញាធរជាតិព្រះវិហារ, ២-របាយការណ៍លទ្ធផលការងារ, ៣-របាយការណ៍ផលប៉ះពាល់ប្រាសាទព្រះវិហារពីជម្លោះប្រដាប់អាវុធកាលពីឆ្នាំ២០២៥, ៤-សំណើសុំអនុម័ត និង៥-បញ្ហាផ្សេងៗ។

នៅក្នុងកិច្ចនេះ ប្រជុំក្រុមប្រឹក្សាភិបាលអាជ្ញាធរជាតិព្រះវិហារ បានគាំទ្រឲ្យអាជ្ញាធរជាតិព្រះវិហារ អនុវត្តគម្រោងអន្តរាគម៍សង្រ្គោះបន្ទាន់ប្រាសាទព្រះវិហារ លើទីតាំងមានហានិភ័យខ្ពស់ ដែលទទួលរងការខូចខាតយ៉ាងធ្ងន់ធ្ងរក្នុងជម្លោះប្រដាប់អាវុធកាលពីឆ្នាំ២០២៥កន្លងទៅ ដើម្បីបង្កាការខូចខាតបន្ថែមទៀតក្នុងរដូវវស្សាខាងមុខ។

ផ្អែកតាមការវាយតម្លៃបឋមនៃលទ្ធផលសិក្សា បានបង្ហាញថា ការខូចខាតប្រាសាទព្រះវិហារដោយសារជម្លោះប្រដាប់អាវុធទាំងពីរលើកកាលពីខែកក្កដា និងខែធ្នូ ឆ្នាំ២០២៥ សរុបចំនួន៥៦២កន្លែង ហើយមានសភាពធ្ងន់ធ្ងរដល់រចនាសម្ព័ន្ធប្រាសាទ ក្បាច់ចម្លាក់ និងការបង្កការខូចខាតចំពោះតម្លៃលេចធ្លោជាសកល។

កាលពីថ្ងៃទី ១៩ ខែមីនា ឆ្នាំ២០២៦ គណៈកម្មាធិការសម្របសម្រួលអន្តរជាតិដើម្បីការពារនិងលើកតម្លៃ ប្រាសាទព្រះវិហារ (ICC-ព្រះវិហារ) បានរៀបចំកិច្ចប្រជុំពេញអង្គ ដើម្បីពិភាក្សាពីវិធានការបន្ទាន់នានាសំដៅដល់អភិរក្សសង្គ្រោះប្រាសាទព្រះវិហារ និងការបោសសម្អាតយុទ្ធភណ្ឌមិនទាន់ផ្ទុះដែលសបន្សល់ទុកដោយស្នាដៃយោធាថៃអំឡុងពេលឈ្លានពានកម្ពុជាទាំងពីរលើក។

ជាលទ្ធផល សហប្រធានចិន និងឥណ្ឌា ព្រមទាំងបណ្តាប្រទេសជាសមាជិក រួមជាមួយអ្នកជំនាញការអន្តរជាតិ បានប្តេជ្ញាបន្តចូលរួមជាមួយរាជរដ្ឋាភិបាលកម្ពុជាក្នុងកិច្ចការពារ និងថែរក្សាបេតិកភណ្ឌពិភពលោកប្រាសាទព្រះវិហារសម្រាប់មនុស្សជាតិជំនាន់ក្រោយៗទៀត។ ជាពិសេសសហប្រធាន ទាំងពីរបានបង្ហាញអំពីជំហរបន្តកិច្ចការអភិរក្សប្រាសាទ​ព្រះវិហារតាមរយៈវេទិកាពិគ្រោះយោបល់នេះ នៅពេលដែលស្ថានភាពវិលមកប្រក្រតីភាពវិញ៕