កីឡា

កីឡាករជំនាញបាល់ដេញ ផល ផានីត ជាប់និស្ស័យជាមួយបាល់ទះដំបូងដោយសារកម្ពស់

បានផុស

៣ ខែ មុន

នៅ

ថ្ងៃសុក្រ ៣ មេសា ២០២៦

ដោយ

កីឡាករជំនាញបាល់ដេញ និងជាជើងចាស់មួយរូបក្នុងវិស័យបាល់ទះ ផល ផានីត ថាការជាប់និស្ស័យជាមួយកីឡាមួយនេះដំបូងដោយសារបានកម្ពស់ខ្ពស់ល្អរហូតគ្រូទំនាក់ទំនងឲ្យចូលតេស្ត និងបានហ្វឹកហាត់ក្លាយជាអាជីពមកដល់សព្វថ្ងៃតែម្ដងទៅ។

កីឡាករ ផល ផានីត បានឲ្យដឹងថា ដំបូងឡើយរូបគេក៏មិនមែនជាអ្នកលេងបាល់ទះពូកែ ឬល្បីឈ្មោះនោះទេ។ រូបគេបានត្រឹមតែជាអ្នកលេងសប្បាយៗក្នុងស្រុកភូមិជាមួយមិត្តភ័ត្ររាល់ពេលទំនេរពីការងារ និងការរៀនសូត្រតែប៉ុណ្ណោះ។

អ្នកស្រុកបាភ្នំរូបនេះបន្ថែមទៀតថា បើរំលឹកទៅអតីតកាលគឺជំនាន់ឆ្នាំ២០១៦ នោះរូបគេបានឡើងទៅរៀននៅវិទ្យាល័យបន្ទាប់មកដោយសារតែមានកម្ពស់ខ្ពស់ល្អគ្រូៗក៏បានកត់ឈ្មោះបញ្ជូនទៅខេត្តដើម្បីធ្វើតេស្តជ្រើសរើសកីឡាករនាពេលនោះ។ រំលងទៅត្រឹមប៉ុន្មានខែប៉ុណ្ណោះរូបគេក៏ត្រូវបានជ្រើសរើសឲ្យចូលហ្វឹកហាត់ជាមួយក្រុម ស.ស.យ.ក ខេត្តព្រៃវែង និងក្រោយមកប្ដូរឈ្មោះទៅជាវិសាខាតែម្ដង។ អំឡុងនៅវិទ្យាល័យនោះរូបគេមានកម្ពស់រហូតដល់ទៅ ១.៧៥ Cm ទៅហើយខណៈទើបតែអាយុប្រហែល ១៦ឆ្នាំនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ផល ផានីត

កីឡាករជំនាញបាល់ដេញរូបនេះ ចូលរួមហ្វឹកហាត់តាំងពីជំនាន់សិស្សច្បង ពិន សារ៉ុន សួន ចាន់ណារ៉ូ អាត វុត្ថា គុណ ប៊ុនសាន ម៉ាប៊ិន យ៉ា និងកីឡាករជើងចាស់មួយចំនួនទៀត។ រូបគេហ្វឹកហាត់នៅទីនោះតាំងពីឆ្នាំ២០១៦ រហូតដល់អំឡុងឆ្នាំ២០២៣ ទើបចែកផ្លូវគ្នាជាមួយក្លឹប និងបន្តអាជីពបាល់ទះនេះជាមួយក្លឹបស្នងការ ន.ប រាជធានីភ្នំពេញ។

កីឡាករ ផល ផានីត

បញ្ជាក់ដែរថា ផល ផានីត បច្ចុប្បន្ននេះជាកីឡាកររបស់ក្លឹបបាល់ទះស្នងការ ន.ប រាជធានីភ្នំពេញ លេងក្នុងតួនាទីបាល់ដេញ។ រូបគេធ្លាប់មានស្នាដៃជាច្រើននាពេលកន្លងដូចជាជួយវិសាខាលើកពានរង្វាន់សម្ដេច ក្រឡាហោម លើកទី១ ជួយជម្រើសជាតិឈ្នះមេដាយសំរឹទ្ធិ ស៊ីហ្គេម លើកទី៣១ នៅវៀតណាម ជួយជម្រើសជាតិឈ្នះមេដាយប្រាក់ស៊ីហ្គេម លើកទី៣២ នៅកម្ពុជា និងជួយក្រុមបាល់ទះស្នងការ ន.ប រាជធានីភ្នំពេញ ឈ្នះពានរង្វាន់សម្ដេច ក្រឡាហោម លើកទី៤ ផងដែរ៕