ត្រាំ ប្រកាសថា នឹងប្រើគ្រឿងចក្រធុនធំច្រើនគ្រឿង កាយយកអ៊ុយរ៉ាញ៉ូមអ៊ីរ៉ង់ បញ្ជូនមកអាមេរិក

ប្រមុខសេតវិមាន ដូណាល់ ត្រាំ បានប្រកាសប្រើគ្រឿងចក្រច្រើនគ្រឿង ដើម្បីកាយយកសារធាតុអ៊ុយរ៉ាញ៉ូមរបស់អ៊ីរ៉ង់ ហើយយកមកកាន់សហរដ្ឋអាមេរិក។

ថ្លែងក្នុងព្រឹត្តិការណ៍ Turning Point USA នៅទីក្រុង Phoenix នៃរដ្ឋ Arizona កាលពីថ្ងៃសុក្រទី១៧ខែមេសាឆ្នាំ២០២៦ ប្រមុខរដ្ឋាភិបាលទីក្រុងវ៉ាស៊ីនតោន លើកឡើងថា លោកនឹងបញ្ជូនគ្រឿងចក្រធំៗចូលទៅក្នុងប្រទេសអ៊ីរ៉ង់ ដើម្បីកាយយកអ៊ុយរ៉ាញ៉ូមដែលចម្រាញ់រួច ហើយបញ្ជូនវាមកកាន់សហរដ្ឋអាមេរិក។

ស្របពេលជាមួយគ្នានោះដែរ លោកបញ្ជាក់យ៉ាងច្បាស់ថា យើងជាមួយអ៊ីរ៉ង់នឹងចូលទៅជាមួយគ្នា ដើ​ម្បីយកសារធាតុទាំងនោះចេញ ក្រោមក្របខណ្ឌនៃកិច្ចព្រមព្រៀងសន្តិភាពនាពេលអនាគត។

លោកត្រាំនិយាយបែបនេះ ដ្បិតភាគីអ៊ីរ៉ង់ឯណោះ ចេញមុខអះអាងរួចហើយថា ឃ្លាំងស្តុកអ៊ុយរ៉ាញ៉ូមរបស់ខ្លួននឹងមិនផ្ទេរទៅណាឡើយ។

មុននេះដែរ លោកត្រាំ ប្រកាសដោយភាពជឿជាក់ថា កិច្ចព្រមព្រៀងសន្តិភាពរវាងអាមេរិក និងអ៊ីរ៉ង់ កាន់តែខិតជិតមកដល់មែនទែនហើយ ដោយភាគីអ៊ីរ៉ង់បានយល់ព្រមប្រគល់សារធាតុអ៊ុយរ៉ាញ៉ូមដែលបានចម្រាញ់រួច ឬលោកហៅសាមញ្ញថាជា «ធូលីនុយក្លេអ៊ែរ» មកឲ្យអាមេរិកវិញ។

ការផ្អាកកម្មវិធីនុយក្លេអ៊ែរអ៊ីរ៉ង់ គឺជាចម្រូងចម្រាសបំផុតនៃជម្លោះមួយនេះ ពោលគឺខាងអាមេរិកចង់ឲ្យ​អ៊ីរ៉ង់ឈប់ចម្រាញ់អ៊ុយរ៉ាញ៉ូមរហូតដល់​២០ឆ្នាំ ប៉ុន្តែអ៊ីរ៉ង់សុំត្រឹមតែ៥​ឆ្នាំប៉ុណ្ណោះ ដែលចំណុចនេះអាមេរិកមិនទាន់យល់ព្រមនៅឡើយ។

យ៉ាង​ណាមិញ អ៊ីរ៉ង់នៅតែអះអាងថា កម្មវិធីរបស់ខ្លួនគឺធ្វើឡើងដើម្បីសន្តិភាព និងថាមពលស៊ីវិលប៉ុណ្ណោះ។ បច្ចុប្បន្ន គេប៉ាន់ស្មានថាអ៊ីរ៉ង់មានសារធាតុអ៊ុយរ៉ាញ៉ូមកម្រិតខ្ពស់ប្រហែល​៤០០​គីឡូក្រាម ដែលជាកម្រិតដែលអាចយកទៅធ្វើជាអាវុធបានយ៉ាងងាយ៕

អត្ថបទ៖ សុខ សុវណ្ណ