ព័ត៌មានអន្ដរជាតិ

ប្រធានាធិបតីតួកគី៖ ការវាយប្រហារខុសច្បាប់លើអ៊ីរ៉ង់ បង្កើនអសន្តិសុខក្នុងតំបន់

បានផុស

៥ ថ្ងៃ មុន

នៅ

ថ្ងៃសៅរ៍ ១៨ មេសា ២០២៦

ដោយ

ប្រធានាធិបតីតួកគី លោក Recep Tayyip Erdogan បានលើកឡើងថា ការវាយប្រហារដោយខុសច្បាប់របស់សហរដ្ឋអាមេរិក-អ៊ីស្រាអែលលើប្រទេសអ៊ីរ៉ង់បានបង្កើនហានិភ័យនិងបង្កអសន្តិសុខក្នុងតំបន់មជ្ឈិមបូព៌ា។

សារព័ត៌មាន TRT World ផ្សាយនៅថ្ងៃទី១៨ ខែមេសា ឆ្នាំ២០២៦ ឲ្យដឹងថា អំឡុងពេលជួបជាមួយនាយករដ្ឋមន្ត្រីប៉ាគីស្ថាន លោក Shehbaz Sharif និងប្រមុខរដ្ឋកាតា លោក Emir Sheikh Tamim bin Hamad Al Thani ក្រៅវេទិកាការទូត Antalya កាលពីថ្ងៃសុក្រ ប្រធានាធិបតីតួកគី លោក Erdogan និយាយថា៖ « តួកគីនឹងបន្តពង្រឹងកិច្ចខិតខំប្រឹងប្រែង ដើម្បីរក្សាបទឈប់បាញ់និងធានាសន្តិភាពយូរអង្វែង»។

លោក Sharif, Erdogan, និង លោក Tamim bin ។ រូបភាព៖ TRT World

ប្រមុខរដ្ឋតួកគី ក៏បានបញ្ជាក់ថា ជម្លោះកំពុងបន្តក្នុងតំបន់បង្ហាញពីតម្រូវការសម្រាប់ស្តារសន្តិសុខតំបន់ថ្មីដែលមានមូលដ្ឋានរឹងមាំ។ ប្រទេសតួកគីនឹងបន្តពិភាក្សាលើបញ្ហានេះយ៉ាងយកចិត្តទុកដាក់ ជាមួយប្រទេសនានាក្នុងតំបន់។

មេដឹកនាំទាំងបីក៏បានពិភាក្សាពីជំហានរួមគ្នាដែលអាចធ្វើទៅបាន ដើម្បីសម្រេចនូវសន្តិភាពយូរអង្វែង និងប្រកបដោយចីរភាពនៅទូទាំងតំបន់។ មិនតែប៉ុណ្ណោះ លោក Erdogan និង លោក Sharif ក៏បានពិភាក្សាពីទំនាក់ទំនងទ្វេភាគី និងការចរចាបទឈប់បាញ់ដែលកំពុងបន្ត ទាក់ទងនឹងប្រទេសអ៊ីរ៉ង់ ដោយគូសបញ្ជាក់ពីការសម្របសម្រួលផ្នែកការទូតដែលកំពុងកើតឡើងផងដែរ។

លោក Erdogan និយាយថា៖ « ប្រទេសតួកគីនឹងបន្តពង្រីកកិច្ចសហប្រតិបត្តិការជាមួយប្រទេសប៉ាគីស្ថានក្នុងវិស័យសំខាន់ៗ រួមមាន ថាមពល ពាណិជ្ជកម្ម និងការពារជាតិ»។

ប្រធានាធិបតីតួកគីបានសរសើរពីតួនាទីរបស់ប្រទេសប៉ាគីស្ថានក្នុងការធានាបទឈប់បាញ់ ហើយថាភាគីទាំងពីរនឹងខិតខំប្រឹងប្រែងឆ្ពោះទៅរកកិច្ចព្រមព្រៀងសន្តិភាពកាន់តែទូលំទូលាយ។

លោក Erdogan សង្កត់ធ្ងន់ថា៖ « បទឈប់បាញ់នៅតំបន់ហ្គាហ្សាត្រូវតែពង្រឹង និងស្តារសន្តិសុខក្នុងតំបន់ថ្មី ហើយអស្ថិរភាពនានាមិនគួររារាំងលើកិច្ចខិតខំប្រឹងប្រែងឆ្ពោះទៅរកដំណោះស្រាយ ចំពោះរដ្ឋពីរសម្រាប់ប៉ាឡេស្ទីននោះទេ»៕

ប្រែសម្រួល៖ ណឺ មិនា