អាជ្ញាធរខណ្ឌ ៧ មករា ចុះត្រួតពិនិត្យលក្ខណៈបច្ចេកទេស និង ពន្លឿនដំណើរការជួសជុលការ៉ូឡា ជុំវិញបរិវេណផ្សារអូរឬស្សី

អភិបាលខណ្ឌ ៧ មករា ដឹកនាំមន្រ្តីជំនាញពាក់ព័ន្ធ ព្រមទាំងគណៈកម្មការផ្សារ ចុះត្រួតពិនិត្យ និង ពន្លឿនលើដំណើរការជួសជុលការ៉ូឡាជុំវិញបរិវេណផ្សារអូរឬស្សី ឲ្យកាន់តែមានប្រសិទ្ធភាពខ្ពស់។

នៅថ្ងៃទី ២៨ ខែឧសភា ឆ្នាំ ២០២៦ នេះ លោក ថេង សុថុល អភិបាលខណ្ឌ ៧ មករា បានដឹកនាំមន្រ្តីជំនាញពាក់ព័ន្ធ និង ក្រុមការងារបច្ចេកទេសទទួលសាងសង់ ជួសជុលផ្លាស់ប្ដូរការ៉ូឡាថ្មី នៅជុំវិញបរិវេណផ្សារ​អូរឬស្សី ដើម្បីត្រួតពិនិត្យលក្ខណៈបច្ចេកទេសស្ដង់ដារត្រឹមត្រូវ និង ជួយពន្លឿនការងារឲ្យឆាប់រួចរាល់ផងដែរ។

លោក ថេង សុថុល បានឲ្យដឹងថា លោកបានដឹកនាំមន្រ្តីពាក់ព័ន្ធ រួមជាមួយគណៈកម្មការផ្សារអូរឬស្សី ចុះត្រួតពិនិត្យដំណើរការជួសជុល ការ៉ូឡា ដើម្បីឲ្យត្រូវលក្ខណៈបច្ចេកទេសតាមស្តង់ដារកំណត់។

លោកបន្តថា ដោយឃើញការ៉ូឡាជុំវិញបរិវេណផ្សារមានសភាពចាស់ ទើបលោកចាត់ឲ្យគណៈកម្មការផ្សារពន្លឿនការងារនេះឲ្យបានឆាប់រហ័ស ងាយស្រួលដល់អាជីវករប្រកបអាជីវកម្ម និង ភ្ញៀវមកផ្សារ ដើរថ្មើរជើង មិនឲ្យជួបការលំបាកបន្តទៀត។

ក្នុងនាមអាជ្ញាធរខណ្ឌ លោក ថេង សុថុល សូមការអធ្យាស្រ័យ និង យោគយល់ ពីប្រជាពលរដ្ឋ ចំពោះដំណើរការជួសជុលដាក់ការ៉ូឡាថ្មីជុំវិញបរិវេណផ្សារអូរឬស្សី ដែលអាច បង្កការរំខានទៅដល់ការប្រកបអាជីវកម្ម និង ស្ទះចរាចរណ៍ ផងដែរ៕
អត្ថបទ ៖ រដ្ឋា