ព័ត៌មានជាតិ

យោងតាមច្បាប់ តើគ្រឹះស្ថានធនាគារអាចចូលឆែកប្រវត្តិឥណទានហិរញ្ញវត្ថុ (CBC) របស់អតិថិជន ដោយរបៀបណា?

បានផុស

១ ខែ មុន

នៅ

ថ្ងៃចន្ទ ១ មិថុនា ២០២៦

ដោយ

អ្នកជំនាញផ្នែកហិរញ្ញវត្ថុបានពន្យល់ពីនីតិវិធី ដែលគ្រឹះស្ថានហិរញ្ញវត្ថុនិងធនាគារ អាចមានសិទ្ធិក្នុងការពិនិត្យប្រវត្តិឥណទានរបស់អតិថិជន (CBC) ដោយយោងតាមការកំណត់នៃច្បាប់។

លោក ខុម ច័ន្ទតារា នាយកប្រតិបត្តិក្រុមហ៊ុនក្រេឌីត ប្យូរ៉ូ ខេមបូឌាបានបញ្ជាក់ថា គ្រឹះស្ថានហិរញ្ញវត្ថុអាចចូលត្រួតពិនិត្យប្រវត្តិឥណទានរបស់អតិថិជន ដែលអាចធ្វើឡើងតាមពីរករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខុម ច័ន្ទតារា នាយកប្រតិបត្តិក្រុមហ៊ុនក្រេឌីត ប្យូរ៉ូ ខេមបូឌា

លោកលើកឡើងករណីទទួលបានការយល់ព្រមពីអតិថជន។ ជាទូទៅនៅពេលដែលអតិថិជនស្នើសុំឥណទាន (កម្ចី) ពីគ្រឹះស្ថានហិរញ្ញវត្ថុ ពួកគេត្រូវបំពេញ «ពាក្យស្នើសុំឥណទាន» ដែលនៅក្នុងពាក្យស្នើសុំនោះ ច្បាប់តម្រូវឱ្យមានប្រយោគមួយ ដែលបញ្ជាក់ពីការយល់ព្រមរបស់អតិថិជន។

នៅពេលអតិថិជនផ្តិតមេដៃ ឬចុះហត្ថលេខាលើពាក្យស្នើសុំនោះ វាស្មើនឹងការផ្តល់សិទ្ធិឱ្យគ្រឹះស្ថាន ក្នុងការឆែកមើលប្រព័ន្ធព័ត៌មានឥណទានរបស់ខ្លួនហើយ។

លោកលើកករណីមួយទៀត ដែលច្បាប់ក៏ផ្តល់លទ្ធភាពនិងសិទ្ធិទៅឱ្យគ្រឹះស្ថានហិរញ្ញវត្ថុអាចឆែកមើលប្រព័ន្ធព័ត៌មានឥណទានអតិថិជនរបស់ខ្លួន ក្នុងករណីដែលអតិថិជននោះជាអតិថិជនសកម្ម ដែលកំពុងប្រើប្រាស់ឥណទានរបស់គ្រឹះស្ថានស្រាប់។

លោកបញ្ជាក់យ៉ាងដូច្នេះថា «គ្រឹះស្ថានមានសិទ្ធិក្នុងការពិនិត្យឡើងវិញនូវប្រវត្តិឥណទានរបស់អតិថិជនជាប្រចាំ។ ឧទាហរណ៍ ៦ ខែ ម្តង ឬ ១២ ខែម្តង ទៅតាមគោលនយោបាយរបស់គ្រឹះស្ថាននីមួយៗដើម្បីបង្ការហានិភ័យ និងគ្រប់គ្រងហានិភ័យឥណទាន ដោយមិនចាំបាច់សុំការយល់ព្រមរាល់ពេលឆែកនោះឡើយ»។

ពាក់ព័ន្ធដំណើរការប្រព័ន្ធចែករំលែកឥណទាន CBC លោក ខុម ច័ន្ធតារា បានអះអាងថា ប្រព័ន្ធនេះមិនត្រឹមតែជួយដល់គ្រឹះស្ថានហិរញ្ញវត្ថុក្នុងការវាយតម្លៃហានិភ័យប៉ុណ្ណោះទេ ប៉ុន្តែថែមទាំងជួយការពារអតិថិជនពីការជាប់បំណុលលើសលប់ និងជួយឱ្យពួកគេអាចគ្រប់គ្រងហានិភ័យហិរញ្ញវត្ថុខ្លួនឯងបានល្អ។

គម្រោងទៅថ្ងៃអនាគត លោកបញ្ជាក់ថា CBC នឹងបន្តធ្វើបច្ចុប្បន្នភាពកម្មវិធីទូរសព្ទ (Mobile App) ជំនាន់ថ្មី ដែលក្រៅពីផ្តល់ព័ត៌មានពីទីតាំងនិងព័ត៌មានរបស់គ្រឹះស្ថាននានា ក៏នឹងដាក់បញ្ចូលព័ត៌មានអំពីផលិតផលរបស់គ្រឹះស្ថាន ដើម្បីឱ្យអ្នកប្រើប្រាស់ឬអតិថិជនទូទៅអាចទទួលបានព័ត៌មានកាន់តែសម្បូរបែប។

ក្នុងវេទិកាពិភាក្សារវាងអ្នកសារព័ត៌មាន និងអ្នកជំនាញហិរញ្ញវត្ថុស្តីពីការលើកកម្ពស់ការប្រើប្រាស់ឥណទានប្រកបដោយសុវត្ថិភាព អ្នកស្រី ម៉ក់ រស្ម៊ី អគ្គនាយករងបទបញ្ញត្តិនិងបរិយាបន្នហិរញ្ញវត្ថុនៃធនាគារជាតិកម្ពុជា ក៏មើលឃើញប្រព័ន្ធចែករំលែកព័ត៌មានឥណទាន (CBC) បានផ្តល់អត្ថប្រយោជន៍យ៉ាងច្រើន ដែលជួយបង្កើនបរិយាកាសវិនិយោគនៅក្នុងប្រទេសកម្ពុជាឱ្យកាន់តែល្អប្រសើរឡើង។

អ្នកស្រីបានលើកឡើងពីផែនការជំរុញការផ្សព្វផ្សាយ ដើម្បីលើកកម្ពស់ចំណេះដឹងផ្នែកហិរញ្ញវត្ថុដល់សាធារណជន ជាពិសេសអតិថិជនដែលបម្រុងនឹងប្រើប្រាស់សេវាឱ្យយល់ដឹងពីចំណុចសំខាន់ៗមុនពេលសម្រេចចិត្តខ្ចីប្រាក់ ដូចជាអត្រាការប្រាក់ សមត្ថភាពសងត្រឡប់ សិទ្ធិ និងកាតព្វកិច្ចរបស់ពួកគេ។

ក្នុងឱកាសនោះ ថ្នាក់ដឹកនាំធនាគារជាតិរូបនេះ ផ្តល់ការណែនាំដល់អ្នកប្រើប្រាស់ឬអតិថិជនដែលជួបប្រទះបញ្ហា ឬមិនពេញចិត្តនឹងសេវាកម្មលើការប្រើប្រាស់សេវាកម្មហិរញ្ញវត្ថុ មានសិទ្ធិដាក់ពាក្យបណ្តឹងឬតវ៉ា តាមរយៈឧបករណ៍និងចរន្តនានាដើម្បីការពារសិទ្ធិស្របច្បាប់របស់ខ្លួន៕

បន្តចុចអាន៖ កម្ចីក្រោម ២០០០ ដុល្លារ ពីមីក្រូហិរញ្ញវត្ថុតាមជនបទ មិនត្រូវការដាក់ទ្រព្យបញ្ចាំ

បន្តចុចអាន៖ ស្ថាប័នហិរញ្ញវត្ថុកូរ៉េចំនួន ១៥ កំពុងមានវត្តមានបោះទុនវិនិយោគវិស័យហិរញ្ញវត្ថុនៅកម្ពុជា