កីឡា

កីឡាករ លឹម សុខវឌ្ឍន៍នន្ទ បង្ហើបក្ដីស្រមៃចង់ឈ្នះមេដាយមាសឲ្យបាន ១គ្រឿងនៅស៊ីហ្គេមប្រទេសណាក៏ដោយ

បានផុស

៥៩ នាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

យុវជន លឹម សុខវឌ្ឍន៍នន្ទ ប្រឡូកក្នុងវិស័យកីឡាហែលទឹក ហែលទឹកពាក់ជើងទា ជាច្រើនឆ្នាំមកហើយ និងធ្លាប់ឈ្នះត្រឹមមេដាយប្រាក់ មេដាយសំរឹទ្ទ ប៉ុណ្ណោះកន្លងមក ខណៈក្ដីស្រមៃធំបំផុតរបស់គេនោះគឺចង់ឈ្នះមេដាយមាសឲ្យបាន ១គ្រឿងក្នុងព្រឹត្តិការណ៍ស៊ីហ្គេមប្រទេសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ លឹម សុខវឌ្ឍន៍នន្ទ

កីឡាករ លឹម សុខវឌ្ឍន៍នន្ទ បានឲ្យដឹងថា រូបគេចូលហ្វឹកហាត់កីឡាហែលទឹកនេះចាប់តាំងពីឆ្នាំ២០១១ មកម្ល៉េះ និងបានជាប់ជាកីឡាករជម្រើសជាតិហែលទឹកពាក់ជើងទាអំឡុងឆ្នាំ២០២២ ដែលវិញ្ញាសានេះទើបតែបង្កើតដំបូងនៅកម្ពុជា។

និស្សិតឆ្នាំទី១ ផ្នែក IT រូបនេះបន្ថែមទៀតថា គោលដៅសំខាន់ និងជាក្ដីស្រមៃធំបន្ទាប់ទៅមុខទៀតនេះគឺការឈ្នះមេដាយមាសស៊ីហ្គេមឲ្យបាន។ រូបគេធ្លាប់ឈ្នះមេដាយសំរឹទ្ធនៅស៊ីហ្គេម វៀតណាម និងធ្លាប់ឈ្នះមេដាយប្រាក់ និងសំរឹទ្ធ នៅស៊ីហ្គេមកម្ពុជា អំឡុងឆ្នាំ២០២៣ កន្លងទៅនេះ។ ក្រៅពីនេះរូបគេក៏ធ្លាប់ឈ្នះមេដាយប្រាក់ សំរឹទ្ធ ក្នុងការប្រកួតហែលទឹកពាក់ជើងទាជើងឯកអាស៊ីអាគ្នេយ៍ផងដែរពីមុនមក។

ក្រុមហែលទឹកពាក់ជើងទា

ដូច្នេះហើយរូបគេមិនទាន់ស្គាល់ការឈ្នះមេដាយមាសនៅស៊ីហ្គេមទាំងពីរលើកដែលធ្លាប់ចូលរួមនោះទេ។ កីឡាករវ័យ ២០ឆ្នាំរូបនេះនឹងរៀបចំខ្លួន ពង្រឹងការហ្វឹកហាត់ បំពេញចំណុចខ្វះខាតផ្សេងៗដែលមានកន្លងមកដើម្បីឈានទៅរកជ័យជម្នះមេដាយមាសស៊ីហ្គេមឲ្យបាននៅថ្ងៃខាងមុខ។

ក្រុមហែលទឹកពាក់ជើងទា

បញ្ជាក់ដែរថា លឹម សុខវឌ្ឍន៍នន្ទ បានហ្វឹកហាត់កីឡាហែលទឹកតាំងពីក្មេងៗមកម្ល៉េះ។ រូបគេបច្ចុប្បន្ននេះជាកីឡាករជម្រើសជាតិផ្នែកហែលទឹកពាក់ជើងទា។ យុវជនដែលមានគោលដៅច្បាស់លាស់ និងការប្ដេជ្ញាចិត្តខ្ពស់រូបនេះធ្លាប់ចូលរួមស៊ីហ្គេមចំនួន ២លើក និងឈ្នះមេដាយបានទាំងពីរលើក ប៉ុន្តែមិនទាន់បានមេដាយមាសនោះឡើយ៕