វិស័យឯកជនស្នើរដ្ឋ​កំណត់ថ្លៃសាំងឡើងវិញ និងសុំលុបចោលការបញ្ចុះតម្លៃ ១សេនក្នុង១លីត្រ

វិស័យឯកជនបានដាក់សំណើទៅកាន់រាជរដ្ឋាភិបាល ដើម្បីពិនិត្យ និងកំណត់តម្លៃលក់រាយប្រេងឥន្ធនៈឡើងវិញ បន្ទាប់ពីជួបប្រទះនូវបញ្ហាប្រឈមមួយចំនួនក្នុងអាជីវកម្ម ខណៈរដ្ឋាភិបាលបញ្ជាក់ថា ស្ថាប័នពាក់ព័ន្ធកំពុងស្ថិតក្នុងដំណាក់កាលពិនិត្យ និងដោះស្រាយ។

យោងតាមរបាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជន លើកទី១៩ ដែលបានផ្សព្វផ្សាយ​កាលពីថ្ងៃ​ទី​៩ ខែ​កក្កដា បាន​ឱ្យ​ដឹង​ថា វិស័យឯកជនបានស្នើសុំឱ្យមានការពិនិត្យឡើងវិញលើរូបមន្តគណនាថ្លៃប្រេងសាំងលក់រាយនៅកម្ពុជា ដោយផ្អែកលើតម្លៃមធ្យមភាគនៃផលិតផលប្រេងឥន្ធនៈលក់ដុំនៅប្រទេសសិង្ហបុរី (MOPS) សម្រាប់ប្រភេទប្រេងសាំងដែលមានបរិមាណស៊ុលហ្វួ ១០ PPM ឬប្រហាក់ប្រហែល។ ជាមួយគ្នានេះ ភាគីឯកជនក៏បានស្នើឱ្យលុបចោលការបញ្ចុះថ្លៃប្រេងសាំង និងម៉ាស៊ូតចំនួន ១សេនដុល្លារ ក្នុងមួយលីត្រផងដែរ។

បច្ចុប្បន្ន ការគណនាអត្រាថ្លៃប្រេងលក់រាយនៅកម្ពុជា គឺផ្អែកលើតម្លៃប្រេងអន្តរជាតិជាមធ្យម (Average MOPS) ដោយមានការរួមចំណែកបញ្ចុះតម្លៃចំនួន ៦.៥ សេនដុល្លារក្នុងមួយលីត្ររួចជាស្រេច និងបានបន្តបញ្ចុះបន្ថែម ១សេនដុល្លារទៀត ដើម្បីជួយសម្រួលដល់ជីវភាពរស់នៅរបស់ប្រជាពលរដ្ឋ ខណៈអត្រាពន្ធគយត្រូវបានកំណត់ស្មើនឹង ០%។

ដោយឡែក ក្នុងស្ថានភាពបច្ចុប្បន្ន រដ្ឋាភិបាលក៏បានសម្រេចបញ្ចុះអាករពិសេសបន្ថែមសម្រាប់ប្រេងសាំងមកនៅត្រឹម ១៥% និងប្រេងម៉ាស៊ូតមកនៅ ០% សម្រាប់ផ្នែកឯកជន ហើយរដ្ឋនឹងទទួលបន្ទុកជំនួសនូវអត្រាពន្ធ ៦% សម្រាប់សាំងធម្មតា និង ១០% បន្ថែមទៀតសម្រាប់ប្រេងម៉ាស៊ូត។

ពាក់ព័ន្ធនឹងវិធានការអន្តរាគមន៍នេះ នាយករដ្ឋមន្ត្រី សម្តេចធិបតី ហ៊ុន ម៉ាណែត កាលពីពេលកន្លងទៅធ្លាប់បានបញ្ជាក់ថា ក្នុងមួយខែៗ រដ្ឋាភិបាលត្រូវខាតបង់ចំណូលថវិការដ្ឋប្រមាណ ៥០លានដុល្លារអាមេរិក តាមរយៈការទម្លាក់អត្រាពន្ធទាំងនេះ ដើម្បីទប់ស្កាត់ការហក់ឡើងខ្លាំងនៃតម្លៃប្រេងសាំង និងម៉ាស៊ូតនៅលើទីផ្សារ ដែលបង្កឡើងដោយវិបត្តិសាកល។

យោងតាមសេចក្ដីជូនដំណឹងរបស់ក្រសួងពាណិជ្ជកម្ម គិតចាប់ពីថ្ងៃទី១៤ ដល់ថ្ងៃទី១៧ ខែកក្កដា ឆ្នាំ២០២៦ នេះ តម្លៃប្រេងសាំងធម្មតានៅកម្ពុជា ត្រូវបានកំណត់លក់ក្នុងតម្លៃ ៣ ៩០០រៀល ក្នុងមួយលីត្រ ខណៈប្រេងម៉ាស៊ូតមានតម្លៃ ៤ ៣០០រៀល ក្នុងមួយលីត្រ៕

អត្ថបទដោយ៖ ហ៊ុន សិរីវឌ្ឍន៍