វៀតណាមទទួលអ្នកដំណើរអន្តរជាតិតាមផ្លូវអាកាសជាង ២៦ លាននាក់ ៦ ខែដើមឆ្នាំ

វៀតណាមបានទទួលអ្នកដំណើរអន្តរជាតិតាមផ្លូវអាកាសចំនួន ២៦,២ លាននាក់ ក្នុងរយៈពេល ៦ ខែដើមឆ្នាំ ២០២៦ កើនឡើង ១៥,៤% ធៀបនឹងរយៈពេលដូចគ្នាកាលពីឆ្នាំមុន ដែលឆ្លុះបញ្ចាំងពីការបន្តរីកចម្រើននៃវិស័យអាកាសចរណ៍ និងការពង្រឹងតួនាទីរបស់ប្រទេសនេះក្នុងបណ្ដាញដឹកជញ្ជូនតំបន់។

​អាជ្ញាធរអាកាសចរណ៍ស៊ីវិលវៀតណាម (CAAV) បានឱ្យដឹងថា ក្រុមហ៊ុនអាកាសចរណ៍វៀតណាមបានដឹកជញ្ជូនអ្នកដំណើរអន្តរជាតិ ៩,៦ លាននាក់ កើនឡើង ០,២% និងស្មើប្រមាណ ៣៦,៦% នៃអ្នកដំណើរអន្តរជាតិសរុប។ ចំណែកអ្នកដំណើរក្នុងស្រុកមាន ១៨,៧ លាននាក់ កើនឡើង ០,៣%។

​បច្ចុប្បន្ន ក្រុមហ៊ុនអាកាសចរណ៍វៀតណាមកំពុងដំណើរការជើងហោះហើរអន្តរជាតិចំនួន ១០៩ ខ្សែ ទៅកាន់ប្រទេស និងដែនដីចំនួន ២២។ ទន្ទឹមនឹងនេះ ក្រុមហ៊ុនអាកាសចរណ៍បរទេសមកពី ៤១ ប្រទេស និងដែនដី កំពុងប្រតិបត្តិការជើងហោះហើរទៀងទាត់ចំនួន ២៣៥ ខ្សែ មកកាន់វៀតណាម។

ទោះជាយ៉ាងណា CAAV បានព្រមានថា កំណើនអ្នកដំណើរ និងទំនិញកំពុងបង្កើនសម្ពាធលើប្រតិបត្តិការអាកាសចរណ៍ ជាពិសេសនៅរដូវមានអ្នកដំណើរច្រើន អាកាសធាតុមិនអំណោយផល ហានិភ័យពីដ្រូន សត្វស្លាប និងកត្តាសុវត្ថិភាពផ្សេងៗនៅព្រលានយន្តហោះ។

អគ្គនាយក CAAV លោក Uông Việt Dũng បានអំពាវនាវឱ្យគ្រប់ស្ថាប័ន និងអង្គភាពពាក់ព័ន្ធ អនុវត្តយ៉ាងម៉ឺងម៉ាត់នូវបទប្បញ្ញត្តិសុវត្ថិភាពអាកាសចរណ៍ និងស្តង់ដាររបស់អង្គការអាកាសចរណ៍ស៊ីវិលអន្តរជាតិ (ICAO) ព្រមទាំងពង្រឹងការវាយតម្លៃហានិភ័យ ប្រព័ន្ធគ្រប់គ្រងសុវត្ថិភាព (SMS) ការបណ្តុះបណ្តាលធនធានមនុស្ស និងការប្រើប្រាស់បច្ចេកវិទ្យាឌីជីថល ដើម្បីធានាសុវត្ថិភាព ខណៈវិស័យអាកាសចរណ៍បន្តរីកចម្រើន៕