ជួយក្មេងជំទង់លេង FACEBOOK យ៉ាងណាកុំឲ្យសុខភាពផ្លូវចិត្តរងការប៉ះពាល់

បណ្ដាញសង្គមក្នុងសម័យឌីជីថលមានទាំងគុណសម្បត្តិនិងគុណវិបត្តិមកព្រមគ្នា។  ចំពោះអ្នកដែលប្រើបានត្រឹមត្រូវ វាក៏ផ្ដល់គុណប្រយោជន៍យ៉ាងច្រើន។ ផ្ទុយទៅវិញ បើពុំចេះទាញយកប្រយោជន៍ល្អៗទេ វាក៏ផ្ដល់ផលអវិជ្ជមានហួសស្មានដែលប៉ះពាល់ទាំងការរស់នៅ ការសិក្សា ការងារ និងផ្លូវចិត្តផងដែរ។

យោងតាមទិន្នន័យរបស់អ្នកវិទ្យាសាស្រ្តស្រាវជ្រាវជាន់ខ្ពស់អ្នកស្រី Linda Charmaraman មកពីមជ្ឈមណ្ឌល Wellesley Centers for Women បានលើកឡើងថា ក្រោយពេលលេងបណ្ដាញសង្គមយុវវ័យ ២១% មានអារម្មណ៍ធ្លាក់ចុះ នៅពេលមើលលើបណ្ដាញឃើញរូបភាពថ្មី ផ្នត់គំនិតប្លែកៗ ពិសេសកើតអារម្មណ៍ប្រៀបធៀបទៅកាន់ទិន្នន័យដែលឃើញនោះ ដែលជាហេតុធ្វើឱ្យផ្លូវចិត្តពួកគេមានបញ្ហា។

ករណីម្យ៉ាងទៀត ដោយសារពួកគេរងការបញ្ចេញមតិពីអ្នកដទៃដែលអាចប៉ះពាល់អារម្មណ៍  ជាហេតុធ្វើឱ្យគំនិតកើតភាពស្មុគស្មាញទៅជាតានតឹង បូករួមនិងការចំណាយពេលលេងច្រើនជ្រុលហួសពេលគេងផងនោះ រឹតតែជាកត្តាចូលរួមអាចវិវវត្តន៍ទៅជាជំងឺបាក់ទឹកចិត្តថែមមួយកម្រិតទៀត។

តើគួរធ្វើបែបណា ដើម្បីឱ្យយុវវ័យប្រើបណ្ដាញសង្គមឱ្យត្រូវផ្លូវ?

វិធីដោះស្រាយលើបញ្ហានេះ អ្នកស្រី Linda Charmaraman ឲ្យដំបូន្មានថា ត្រូវពន្យល់ប្រាប់ពីគុណសម្បត្តិ និងគុណវិបត្តិដែលបណ្ដាញសង្គមផ្ដល់ឱ្យនៅពេលយុវវ័យចាប់ផ្ដើមប្រើប្រាស់វា។

បន្ថែមពីលើនោះ ត្រូវបង្កើតវិន័យក្នុងការលេង កំណត់ពេលវេលាឱ្យបានត្រឹមត្រូវក្នុងការប្រើប្រាស់ ដោយមានម៉ោងរៀន ម៉ោងស្រាវជ្រាវ ម៉ោងស្ដាប់ចម្រៀង ម៉ោងមើលវីដេអូ និងម៉ោងមើលព័ត៌មានជាដើម។

ក្រៅពីនោះ ការតាមដាន(Follow) ផេកឬមានមិត្តក្នុងបណ្ដាញសង្គមដែលមានភាពវិជ្ជមានច្រើន ពិតជាមានឥទ្ធិពលដល់អ្នកប្រើប្រាស់ផងដែរ។ កាលណាមានផេកល្អៗផ្ដល់ចំណេះដឹងល្អៗ ថ្មីៗ ការលើកទឹកចិត្ត វាអាចបញ្ចៀសការមើលឃើញនូវរឿងមិនល្អ និងរឿងអវិជ្ជមានដែលធ្វើឱ្យអារម្មណ៍ធ្លាក់ដុនដាបពិបាកកែខៃ៕

ប្រែសម្រួល៖ សន្យា

ប្រភព៖ Business Insider

ចុចអាន៖ អ្នកជំនាញព្យាបាលផ្លូវចិត្តប្រាប់វិធីសាស្រ្តបំបាត់ស្រ្តេសពីការអាននិងដឹងលឺព័ត៌មានច្រើនជ្រុល

ចុចអាន៖ បណ្តាញ​​សង្គម ជាកត្តា​ចម្បងពាក់ព័ន្ធកំណើន​​ជំងឺផ្លូវចិត្ត​លើ​យុវវ័យ