តារាកំប្លែងល្បីឈ្មោះថៃ Kohtee Aramboy ជាសះស្បើយពីកូវីដហើយ

តារាកំប្លែងល្បីឈ្មោះថៃ Kohtee Aramboy បានជាសះស្បើយពីជំងឺកូវីដ ១៩ ហើយ ហើយបុរសមាឌម៉ាប់រូបនេះក៏អាចត្រឡប់ទៅផ្ទះបានផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការ Live តាម Facebook ពេលត្រឡប់ទៅដល់ផ្ទះ តារាកំបែ្លងក្នុងរឿង “អ្នកប្រដាល់មិនដែលឈ្នះ” រូបនេះបាននិយាយថា “សួស្ដីអ្នកទាំងអស់គ្នា! ខ្ញុំនឹកអ្នកណាស់ ។ ការ Live នេះជាលើកដំបូងហើយដែលយើងបានជួបគ្នា ។ ខ្ញុំបានធ្វើការ Live នេះ ពីព្រោះខ្ញុំចង់អរគុណអ្នករាល់គ្នា” ។

Aramboy បាន Live ទាំងទឹកភ្នែកថា “ឥឡូវនេះនៅក្នុងផ្ទះតែម្នាក់ឯង ខ្ញុំអាចដោះម៉ាសបាន ហើយខ្ញុំចង់អរគុណ និងនិយាយអំពីអ្វីដែលបានកើតឡើង និងចំពោះការព្រួយបារម្ភរបស់អ្នក ។ ពេលនេះទើបខ្ញុំដឹងថាអ្នកណាស្រលាញ់យើង” ។

ជាចុងក្រោយ Aramboy បានបញ្ជាក់ថា “ខ្ញុំចង់ប្រាប់អ្នករាល់គ្នាថា មនុស្សគ្រប់គ្នាត្រូវតែរស់ ហើយត្រូវតែប្រយុទ្ធជាមួយកូវីដទាំងអស់គ្នា ។ កុំមើលស្រាលវីរុសនេះ ។ យើងកើតមកមិនទាន់ពេលវេលាសង្គ្រាមលោកលើកទី ២ ទេ ប៉ុន្តែនេះជាសង្គ្រាមនៃជំងឺដែលត្រូវតែប្រឈមមុខ ។ សង្ឃឹមថាអ្នករាល់គ្នានឹងមានសុខភាពល្អ ។ យើងត្រូវតែរស់ និងតស៊ូជាមួយគ្នា ។ ខ្ញុំមិនចង់បាត់បង់ជីវិតដោយសារជំងឺនេះទេ” ។

គួររំឭកថា Kohtee Aramboy បានឆ្លងជំងឺកូវីដ ១៩ និងបញ្ជូនទៅសម្រាកព្យាបាលនៅមន្ទីរពេទ្យកាលពីថ្ងៃទី ២៩ ខែមិថុនា ក្រោយធ្វើតេស្តរហូតដល់ទៅ ៣ លើក ។

ប្រែសម្រួលដោយ ៖ ជីវ័ន្ត

ប្រភព ៖ Sanook