ប្រព័ន្ធផ្សព្វផ្សាយនៅ អាហ្វហ្គានីស្ថាន ជាង ១៥០ ស្ថាប័នបិទលែងដំណើរការ ក្រោយ តាលីបង់ ដាក់ការរឹតត្បិត

ប្រព័ន្ធផ្សព្វផ្សាយ TOLOnews របស់អាហ្វហ្គានីស្ថានបានរាយការណ៍កាលពីថ្ងៃចន្ទថា យ៉ាងហោចណាស់ប្រព័ន្ធផ្សព្វផ្សាយចំនួន ១៥៣ បានឈប់ដំណើរការនៅក្នុងខេត្តអាហ្វហ្គានីស្ថានចំនួន ២០ ក្នុងរយៈពេលតិចជាងមួយខែ ចាប់តាំងពីការកាន់កាប់ប្រទេសដោយក្រុមតាលីបង់ ។

យោងតាមរបាយការណ៍បានឲ្យដឹងថា ប្រព័ន្ធផ្សព្វផ្សាយដែលលែងមានសកម្មភាពនៅអាហ្វហ្គានីស្ថាន រួមមាន ស្ថានីយវិទ្យុ កាសែត និងប៉ុស្តិ៍ទូរទស្សន៍ ។ ការសម្រេចចិត្តនេះកើតឡើង ដោយសារតែបញ្ហាសេដ្ឋកិច្ចដែលពួកគេកំពុងជួបប្រទះ និងការរឹតត្បិតរបស់តាលីបង់ ។ តំណាងអង្គការឯកទេសបាននិយាយថា ប្រសិនបើបញ្ហាទាំងនេះមិនត្រូវបានដោះស្រាយនោះ នឹងមានប្រព័ន្ធផ្សព្វផ្សាយជាច្រើនលែងមានឆន្ទៈក្នុងការធ្វើការនៅក្នុងប្រទេសនេះ ។

លោក Hujatullah Mujadadi អនុប្រធានសហព័ន្ធអ្នកកាសែតអាហ្វហ្គានីស្ថានបាននិយាយថា “ប្រសិនបើអង្គការដែលគាំទ្រប្រព័ន្ធផ្សព្វផ្សាយ មិនយកចិត្តទុកដាក់ចំពោះប្រព័ន្ធផ្សព្វផ្សាយនោះទេ យើងនឹងបន្តឃើញការបិទប្រព័ន្ធផ្សព្វផ្សាយដែលនៅសល់នៅក្នុងប្រទេស” ។

ទន្ទឹមនោះ អ្នកតំណាងវិទ្យុ និងទូរទស្សន៍បានប្រាប់សារព័ត៌មាន Sputnik ថា ក្នុងចំណោមប្រព័ន្ធផ្សព្វផ្សាយដែលឈប់ដំណើរការមានវិទ្យុ និងទូរទស្សន៍ Enikass ដែលធ្លាប់គ្របដណ្តប់ខេត្តអាហ្វហ្គានីស្ថានចំនួន ៣ ដោយសារតែបញ្ហាផ្នែកហិរញ្ញវត្ថុ បន្ទាប់ពីក្រុមហ៊ុនមួយចំនួនឈប់បង់ប្រាក់សម្រាប់ការផ្សាយពាណិជ្ជកម្មនៅលើប៉ុស្តិ៍ទូរទស្សន៍មួយនេះ ។

គួរបញ្ជាក់ថា បន្ទាប់ពីក្រុមតាលីបង់បានកាន់កាប់អាហ្វហ្គានីស្ថាន ការវាយប្រហារផ្សេងៗប្រឆាំងអ្នកកាសែតបានកើតឡើង ហើយធ្វើឲ្យមានការព្រួយបារម្ភជុំវិញសុវត្ថិភាពអ្នកកាសែតនៅក្នុងប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តាលីបង់ ដកមុខវិជ្ជាណាប្រឆាំងច្បាប់ឥស្លាមចេញពីកម្មវិធីសិក្សា របស់សាកលវិទ្យាល័យ