ថៃ ទទួលភ្លើងខៀវទិញថ្នាំព្យាបាលកូវីដ Molnupiravir ចំនួន ៥ ម៉ឺនគ្រាប់

មជ្ឈមណ្ឌលគ្រប់គ្រងស្ថានភាពជំងឺកូវីដ ១៩ ថៃ (CCSA) បានយល់ព្រមលើសំណើពីក្រសួងសុខាភិបាលដើម្បីទទួលបានថ្នាំលេបតាមមាត់ព្យាបាលកូវីដ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ អ្នកនាំពាក្យ CCSA លោកវេជ្ជបណ្ឌិត Taweesin Visanuyothin បាននិយាយដោយមិនប្រាប់តម្លៃ ឬពេលវេលានៃការដឹកជញ្ជូនថា ក្រសួងគ្រោងនឹងទិញថ្នាំប្រឆាំងវីរុស Molnupiravir ដែលបង្កើតឡើងដោយក្រុមហ៊ុនឱសថអាមេរិក Merck ចំនួន ៥០,០០០ គ្រាប់ ខណៈបច្ចុប្បន្នសំណើនេះបានបញ្ជូនទៅគណៈរដ្ឋមន្ត្រីដើម្បីអនុម័តជាលើកចុងក្រោយហើយ ។

យោងតាមរបាយការណ៍របស់សារព័ត៌មាន Thai PBS World បានឲ្យដឹងថា ក្រុមហ៊ុនឱសថ Merck ត្រូវបានចោទប្រកាន់ពីបទគិតលុយលើសនៃថ្លៃថ្នាំលេបព្យាបាលជាសះស្បើយរយៈពេល ៥ ថ្ងៃក្នុងតម្លៃ ៧១២ ដុល្លារអាមេរិក ។

ចំណែកអ្នកវិភាគនៅសាកលវិទ្យាល័យ Harvard and King’s College London បាននិយាយថា ថ្លៃដើមថ្នាំនេះគឺប្រហែល ១.៧៤ ដុល្លារអាមេរិកក្នុងមួយគ្រាប់ ពោលស្មើនឹង ១៧.៧៤ ដុល្លារអាមេរិកសម្រាប់ការព្យាបាលជាសះស្បើយពេញលេញ ។

ប៉ុន្តែរដ្ឋាភិបាលសហរដ្ឋអាមេរិកបានផ្តល់ប្រាក់ចំនួន ៧១២ ដុល្លាររួចទៅហើយក្នុងមួយគ្រាប់ ខណៈដែលអ្នកសេដ្ឋកិច្ចជាន់ខ្ពស់នៅមជ្ឈមណ្ឌលស្រាវជ្រាវសេដ្ឋកិច្ច និងគោលនយោបាយកត់សម្គាល់ថា វាបានដំឡើងថ្លៃរហូតដល់ ៤,០០០ ភាគរយឯណោះ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ថ្នាំកូវីដលេបមួយថ្ងៃមួយគ្រាប់របស់ ជប៉ុន រឹតតែមានប្រសិទ្ធភាព បើប្រើរួមនឹងថ្នាំ Molnupiravir