ចរាចរណ៍

ផ្ទុះអាវុធមួយគ្រាប់គំរាមអ្នកដេញពីក្រោយ បន្ទាប់ពីបង្កគ្រោះថ្នាក់ចរាចរ

បានផុស

៤ years មុន

នៅ

ថ្ងៃព្រហស្បតិ៍ ១១ វិច្ឆិកា ២០២១

ដោយ

ម្ចាស់រថយន្ដស៊េរីទំនើបមួយគ្រឿងបានដកកាំភ្លើងបាញ់គំរាមអ្នកជិះដេញពីក្រោយចំនួនមួយគ្រាប់ ខណៈដែលបង្កគ្រោះថ្នាក់ចរាចរបណ្ដាលឲ្យយុវជនម្នាក់រងរបួស។

ហេតុការណ៍នេះកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១១ ខែវិច្ឆិកា ឆ្នាំ២០២១ នៅចំណុចមហាវិថីព្រះនរោត្តម កែងផ្លូវលេខ១៣០ ស្ថិតនៅក្នុងសង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានពីជនរងគ្រោះបានបញ្ជាក់ឲ្យដឹងថា មុនពេលកើតហេតុខ្លួននិងមិត្តភ័ក្ដិមានម៉ូតូចំនួន៣គ្រឿង បានធ្វើដំណើរតាមបណ្តោយមហាវិថីព្រះនរោត្តម ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏មានរថយន្តស៊េរីទំនើបមួយគ្រឿងមិនចាំម៉ាក ធ្វើដំណើរតាមបណ្តោយផ្លូវ១៣០ ក្នុងទិសដៅពីកើតទៅលិចក្នុងល្បឿនលឿនក៏បុកម៉ូតូមិត្តភ័ក្តិរបស់ខ្លួន បណ្តាលឲ្យមនុស្សរងរបួស រួចរថយន្តបង្កបានបន្តបើករត់ទៅផ្សារថ្មី។ ភ្លាមៗនោះខ្លួនបានជិះម៉ូតូដេញតាមឃាត់រថយន្តពីក្រោយស្រាប់តែម្ចាស់រថយន្តបើកកញ្ចក់ ដកកាំភ្លើងខ្លីបាញ់ដីមួយគ្រាប់ដើម្បីគំរាម(បន្សល់សំបកគ្រាប់នៅទីតាំងកើតហេតុ) រួចបើករត់គេចបាត់ស្រមោលតែម្តង។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ទីតាំងកើតហេតុរួចធ្វើការសាកសួរជនរងគ្រោះ ដោយមានការភ័យខ្លាចជនរងគ្រោះសុំមិនដាក់ពាក្យបណ្តឹង និងយកម៉ូតូទៅជួសជុលដោយខ្លួនឯង៕