អន្តរជាតិមិនអនុញ្ញាតឲ្យយកលុយទុកនៅក្រៅប្រទេសជាការជួយឲ្យលុយកម្ពុជាចរាចរណ៍នៅក្នុងស្រុក

វិធានការអន្តរជាតិលើកម្ពុជា ដោយមិនអនុញ្ញាតឲ្យយកលុយទៅទុកនៅក្រៅប្រទេស ជាការជួយឲ្យលុយវិលចុះឡើងនៅក្នុងស្រុក។ នេះបើតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ថ្លែងនៅក្នុងពិធីចុះត្រួតពិនិត្យការដ្ឋានសាងសង់ ព្រលានយន្តហោះអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល ព្រឹកថ្ងៃទី០៩ ខែធ្នូ ឆ្នាំ២០២១។

សម្តេចតេជោ មានប្រសាសន៍ដូច្នេះថា« ខ្ញុំអរគុណចំណាត់ការអន្តរជាតិ ដែលមិនអនុញ្ញាតឲ្យបុគ្គលខ្មែរណាយកលុយដាក់ធនាគារនៅក្រៅប្រទេស ខ្ញុំអរគុណជាពិសេស ព្រោះលុយនឹងវាវិលនៅក្នុងស្រុកដដែល…កាលមុននៅពេលដែលអន្តរជាតិ មិនទាន់បានរារាំងក្នុងការយកលុយទៅដាក់នៅក្រៅប្រទេស ខ្មែរយើងមួយចំនួនយកលុយទៅវិនិយោគនៅក្រៅប្រទេស តាមរយៈយកលុយទៅដាក់នៅធនាគារក្រៅប្រទេស វាស្មើនឹងជួយយកលុយទៅវិនិយោគនៅក្រៅប្រទេស ដល់ឥឡូវវិធានការជាអន្តរជាតិ ខ្មែរយើងអត់មានឱកាសយកលុយទៅទុកនៅក្រៅប្រទេសទេ អ៊ីចឹងលុយនឹងវាវិលនៅស្រុកខ្មែរ នៅតាមធនាគារ លុយនឹងបានវិនិយោគជាអលនទ្រព្យ បើទោះបីសម័យកូវីដនេះ ការសាងសង់លំនៅដ្ឋាននៅតែបន្តដំណើរការ លក់នៅតែដាច់»៕