ព័ត៌មានជាតិ

រដ្ឋបាលខេត្តនឹងរៀបចំព្រឹត្តិការណ៍ជិះកង់ យកថវិកាកសាងសាលារៀនតំបន់ដាច់ស្រយាល និងឧបត្ថម្ភមន្ទីរពេទ្យ

បានផុស

៤ years មុន

នៅ

ថ្ងៃអង្គារ ១១ មករា ២០២២

ដោយ

បាត់ដំបង ៖ ខេត្ដបាត់ដំបងនឹងបង្កើតព្រឹត្តិការណ៍ជិះកង់ រៃអង្គាសថវិកាដើម្បីយកទៅកសាងសាលារៀនដាច់ស្រយាលមួយស្ថិតក្នុងស្រុករុក្ខគីរី និងឧបត្ថម្ភដល់មន្ទីរពេទ្យកុមារអង្គរសៀមរាប ដែលនឹងប្រព្រឹត្តទៅនាថ្ងៃទី២៩ ខែមករា ឆ្នាំ២០២២ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មាធិការរៀបចំព្រឹត្តិការណ៍ជិះកង់ខេត្ដបាត់ដំបង បានរៀបចំព្រឹត្តិការណ៍ជិះកង់ក្នុងខេត្ដនេះគឺជាលើកទី១ ដើម្បីលើកកម្ពស់វិស័យទេសចរណ៍ វប្បធម៌ ការអប់រំ លើកស្ទួយសុខភាពកុមារ រៃអង្គាសថវិកាពីសប្បុរសជន និងអ្នកចូលរួម ដើម្បីយកទៅកសាងសាលារៀនក្នុងតំបន់ដាច់ស្រយាលមួយនៅស្រុករុក្ខគីរី និងឧបត្ថម្ភដល់មន្ទីរពេទ្យកុមារអង្គរសៀមរាប ដែលកំពុងជួបបញ្ហាខ្វះខាតនូវថវិកា។

ព្រឹត្តិការណ៍ជិះកង់នេះ នឹងប្រព្រឹត្តិទៅនាថ្ងៃទី២៩ ខែមករា ឆ្នាំ២០២២ ដោយជិះកង់ចេញដំណើរពីរមុខសាលាខេត្ដបាត់ដំបង ឆ្ពោះទៅកាន់ប្រសាទបាសែត ស្ថិតក្នុងឃុំតាប៉ុន ស្រុកសង្កែ ខេត្ដបាត់ដំបង ការជិះកង់នេះគឺមានចម្ងាយ ៣០គីឡូម៉ែត្រ(ទៅ-មក)។

គណៈកម្មាធិការរៀបចំព្រឹត្តិការណ៍ជិះកង់ បានអំពាវនាវសូម អភិបាលក្រុង ស្រុក និង ប្រធានមន្ទីរ អង្គភាព ផ្សព្វផ្សាយជូនដំណឹងដល់មន្ត្រីរាជការ និងបុគ្គលិក ដើម្បីចូលរួមក្នុងព្រឹត្តិការណ៍នេះឱ្យបានច្រើនកុះករតាមការគួរ។

សម្រាប់សាធារណជន និងសប្បុរសជនដែលមានបំណងចុះឈ្មោះចូលរួមគឺអាចចុះឈ្មោះចាប់ពីថ្ងៃជូនដំណឹងរហូតដល់ថ្ងៃទី២៥ ខែមករា ឆ្នាំ២០២២ សូមទំនាក់ទំនងចុះឈ្មោះមកកាន់លេខទូរសព្ទ ០១២ ៣៦ ៥៤ ៥៤ ឬចុះឈ្មោះតាមអនឡាញ៖ https://forms.gle/zf5aEFAKZPhx5NM16។