សម្ដេចតេជោ ហ៊ុន សែន សម្រេចធ្វើចត្តាឡីស័ក ក្រោយប៉ះពាល់ផ្ទាល់ជាមួយអ្នកវិជ្ជមានកូវីដ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី ២៥ ខែកុម្ភៈ ឆ្នាំ ២០២២នេះ បានប្រកាសឲ្យដឹងថា ដោយសារតែសម្ដេច បានប៉ះពាល់ផ្ទាល់ជាមួយអ្នកវិជ្ជមានកូវីដ-១៩។ ដូច្នេះ ដើម្បីធានាកុំឲ្យមានការឆ្លងបន្ត ដែលអាចចេញពីខ្លួនសម្ដេច ក្នុងពេលកំពុងមានការសង្ស័យ គឺសម្ដេចសម្រេចដាក់ខ្លួនធ្វើចត្តាឡីស័ក មួយរយៈពេលខ្លីសិន។

តាមរយៈទំព័រហ្វេសប៊ុកផ្លូវ សម្ដេចតេជោនាយករដ្ឋមន្ត្រី បានសរសេរថា «បងប្អូនជនរួមជាតិជាទីគោរពស្រឡាញ់! ដោយ សារខ្ញុំបានប៉ះពាល់ផ្ទាល់ ជាមួយអ្នកវិជ្ជមានកូវីដ.១៩។ ដើម្បី​ធានាកុំឱយមានការឆ្លងបន្ត ដែលអាចចេញពីខ្លួន ខ្ញុំក្នុងពេលកំពុងមានការសង្ស័យ ខ្ញុំសម្រេចដាក់ខ្លួនធ្វើចត្តាឡីសក័ មួយរយៈពេលខ្លីសិន»។

សម្ដេចតេជោ ហ៊ុន សែន បានសរសេរបន្តថា «ខ្ញុំនឹងរស់នៅដាច់ដោយឡែក តែខ្ញុំនៅតែបន្ត​ធ្វើការតាមទម្លាប់ដូចដែលខ្ញុំ បានធ្វើកាលពីធ្វើចត្តាឡីសក័ ៣លើកមុនៗនោះដែរ។ ខ្ញុំ​មិនទាន់លប់ចោលកម្មវិធី សម្រាប់សប្តាហ៍ក្រោយនៅឡើយទេ»។ ជាមួយគ្នានេះ សម្ដេចតេជោនាយករដ្ឋមន្ត្រី ក៏បានបញ្ជាក់ថា សម្ដេចនឹងបន្តធ្វើ​តេស្ត​ ដើម្បីបញ្ជាក់ពីលទ្ធផលវិជ្ជមាន ឬអវិជ្ជមានកូវីដ-១៩ ដើម្បីបញ្ចប់ការធ្វើចត្តាឡីសក័ ហើយសម្ដេចនឹងជូនព័ត៌មានតាមក្រោយ៕