រុស្ស៊ី ប្រកាសបទឈប់បាញ់ដើម្បីជម្លៀសមនុស្ស

រុស្ស៊ីបានប្រកាសបទឈប់បាញ់មួយដែលចាប់ផ្តើមពីព្រឹកថ្ងៃចន្ទនេះ និងការបើកច្រករបៀងមនុស្សធម៌នៅក្នុងតំបន់ជាច្រើន ។

ការប្រកាសនេះកើតឡើងមួយថ្ងៃ បន្ទាប់ពីជនស៊ីវិលអ៊ុយក្រែនរាប់សែននាក់ដែលព្យាយាមភៀសខ្លួនទៅកាន់កន្លែងសុវត្ថិភាពត្រូវបានបង្ខំឲ្យជ្រកកោន និងលាក់ខ្លួនពីការបាញ់ផ្លោងរបស់រុស្ស៊ីដែលបានវាយលុកទីក្រុងនានានៅភាគកណ្តាល ភាគខាងជើង និងភាគខាងត្បូងរបស់ប្រទេសអ៊ុយក្រែន ។

ក្រុមការងាររុស្ស៊ីបាននិយាយថា បទឈប់បាញ់នឹងចាប់ផ្តើមនៅព្រឹកថ្ងៃចន្ទនេះ ពោលជាថ្ងៃទី ១២ នៃសង្រ្គាមសម្រាប់ជនស៊ីវិលមកពីទីក្រុងកៀវទីក្រុងកំពង់ផែ Mariupol ភាគខាងត្បូង, ទីក្រុង Kharkov ដែលទីក្រុងធំទី ២ របស់អ៊ុយក្រែន និងទីក្រុង Sumy ជាដើម ។

វាមិនច្បាស់ភ្លាមៗថាតើការប្រយុទ្ធនឹងបញ្ឈប់លើសពីតំបន់ដែលបានលើកឡើងនៅក្នុងសេចក្តីថ្លែងការណ៍របស់ក្រុមការងារ ឬនៅពេលណាដែលបទឈប់បាញ់នឹងបញ្ចប់នោះទេ ។

ទន្ទឹមនោះវាក៏ធ្វើឡើង បន្ទាប់ពីការប៉ុនប៉ងបរាជ័យចំនួន ២ ក្នុងការជម្លៀសជនស៊ីវិលចេញពីទីក្រុង Mariupol ដែលគណៈកម្មាធិការអន្តរជាតិនៃកាកបាទក្រហមបានប៉ាន់ប្រមាណថា មនុស្ស ២០០,០០០ នាក់កំពុងព្យាយាមភៀសខ្លួន ។

ក្រុមការងាររុស្ស៊ីបាននិយាយថា បទឈប់បាញ់នៅថ្ងៃចន្ទនេះ និងការបើកច្រករបៀងមនុស្សធម៌ត្រូវបានប្រកាសតាមសំណើរបស់ប្រធានាធិបតីបារាំង Emmanuel Macron ដែលបាននិយាយជាមួយប្រធានាធិបតីរុស្ស៊ីលោក Vladimir Putin កាលពីថ្ងៃអាទិត្យ ៕

ប្រែសម្រួលដោយ ៖ ជីវ័ន្ត

ប្រភព ៖ AP

ចុចអាន ៖ អ្នកស្ម័គ្រចិត្តបរទេស ២ ម៉ឺននាក់ទៅ អ៊ុយក្រែន ប្រយុទ្ធជាមួយទ័ព រុស្ស៊ី