កុងតឺន័រដឹកជញ្ជូនទំនិញពី ចិន មក វៀតណាម ជាច្រើនគ្រឿងកំពុងជាប់គាំង

ផលប៉ះពាល់នៃការបិទខ្ទប់ចុងក្រោយបង្អស់របស់ប្រទេសចិនពាក់ព័ន្ធនឹងវីរុសកូវីដ ១៩ កំពុងអុកលុកវិស័យធុរកិច្ចរបស់ប្រទេសវៀតណាម ហើយបានរំខានដល់ខ្សែសង្វាក់ផ្គត់ផ្គង់ជាសកលដែលទាក់ទងនឹងយុទ្ធសាស្ត្រ “សូន្យកូវីដ” របស់រដ្ឋាភិបាលចិនផងដែរ ។

ទន្ទឹមនោះ សហគ្រាសវៀតណាមជាច្រើនកំពុងពន្យារពេលដឹកជញ្ជូន និងស្វែងរកមធ្យោបាយកាត់បន្ថយការពឹងផ្អែករបស់ពួកគេលើទីផ្សារចិន ដែលជាបញ្ហាកាន់តែអាក្រក់ទៅៗនៅទូទាំងជំងឺរាតត្បាត ។

កប៉ាល់កុងតឺន័រជាច្រើនគ្រឿងនៅខាងក្រៅកំពង់ផែធំៗរបស់ចិនត្រូវបានជាប់គាំង និងអូសបន្លាយពេលដឹកជញ្ជូនទំនិញ នៅពេលដែលការផ្ទុះឡើងនៃវីរុសកូវីដ ១៩ នៅក្នុងមជ្ឈមណ្ឌលនាំចេញផលិតកម្មរួមទាំងទីក្រុង Shenzhen និង Dongguan ។

មុនពេលការចាក់បិទនាពេលបច្ចុប្បន្ន ជាធម្មតាវាចំណាយពេលដឹកជញ្ជូនទំនិញប្រហែល ៣៥ ថ្ងៃសម្រាប់ទំនិញដែលដឹកជញ្ជូន ឬផ្ញើតាមសមុទ្រ ខណៈបច្ចុប្បន្នពេលវេលា​នោះ​បាន​កើន​ដល់ ​៤៥ ​ថ្ងៃ ។

លោក Nguyen Van Thong នាយកក្រុមហ៊ុនមួយដែលមានឯកទេសក្នុងការនាំចូលគ្រឿងបន្លាស់សម្រាប់ម៉ាស៊ីនចំហេះខាងក្នុងបាននិយាយថា “ស្ថានភាពនេះក៏កំពុងប៉ះពាល់ដល់តម្លៃផ្គត់ផ្គង់ផងដែរ” ។

ជាចុងក្រោយលោក Thong បានបញ្ជាក់ថា “យើងនៅតែស្វែងរកមធ្យោបាយនាំចូលទំនិញ ប៉ុន្តែពេលវេលាដឹកជញ្ជូនពិតជាយូរ ហើយតម្លៃសម្រាប់ទំនិញផ្សេងៗគ្នាក៏កំពុងកើនឡើងផងដែរ” ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ចិន កំពុងផលិតយន្តហោះល្បឿនលឿនជាងសំឡេង ធ្វើដំណើរទៅ ទីក្រុងញូវយ៉ក ប្រើពេលត្រឹម ១ ម៉ោង