លោក ខៀវ កាញារីទ្ធ ៖ ទិវាសេរីភាពសារព័ត៌មានធ្វើឡើង ដើម្បីលើកកម្ពស់ក្រមសីលធម៌វិជ្ជាជីវៈអ្នកសារព័ត៌មាន

លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានគូសបញ្ជាក់ថា ទិវាសេរីភាពសារព័ត៌មានសកលលោកដែលធ្វើឡើងជារៀងរាល់ឆ្នាំនាថ្ងៃទី០៣ ឧសភា គឺដើម្បីលើកកម្ពស់សេរីភាពខាងសារព័ត៌មាន ការការពារឯករាជ្យភាពប្រព័ន្ធផ្សព្វផ្សាយ និងការឆ្លុះបញ្ចាំងអំពីបញ្ហាប្រឈមនៃសេរីភាពខាងសារព័ត៌មាន និងសេរីភាពនៃការបញ្ចេញមតិ ព្រមទាំងក្រមសីលធម៌  វិជ្ជាជីវៈរបស់អ្នកសារព័ត៌មាន។ ការគូសបញ្ជាក់នេះ ធ្វើឡើងនៅក្នុងពិធីអបអរសាទរទិវាសេរីភាពសារព័ត៌មានសកលលោកលើកទី២៩ នៅព្រឹកថ្ងៃអង្គារនេះ។

នៅក្នុងពិធីអបអរសាទេនៅសណ្ឋាគារ សុខា ជ្រោយចង្វារ លោករដ្ឋមន្ត្រី ខៀវ កាញារីទ្ធ បានលើកឡើងថា ក្នុងកាលៈទេសៈដែលប្រទេសកម្ពុជាកំពុងតែរស់នៅដោយសន្តិភាព វឌ្ឍនភាព និងការអភិវឌ្ឍ  រាជរដ្ឋាភិបាលកម្ពុជា បានបើកសិទ្ធិ សេរីភាពយ៉ាងទូលំទូលាយលើសេរីភាពខាងសារព័ត៌មាន និងសេរីភាពនៃការបញ្ចេ​ញមតិ ដែលធានាគាំពារដោយរដ្ឋធម្មនុញ្ញនៃកម្ពុជា និងច្បាប់ស្ដីពីរបបសារព័ត៌មាន។  លោកថា មកដល់ពេលនេះ ចំនួនសារព័ត៌មាននៅកម្ពុជាបានកើនឡើងជាលំដាប់ទាំងសារព័ត៌មានបោះពុម្ពផ្សាយ និងសារព័ត៌មានផ្សាយតាមប្រព័ន្ធអេឡិចត្រូនិច។ បើតាមលោករដ្ឋមន្រ្តី ការកើនឡើងយ៉ាងសំបូរបែបសេរីភាពខាងសារព័ត៌មាននេះ បានបង្ហាញយ៉ាងច្បាស់នូវថាមពលដ៏ខ្លាំងក្លានៃប្រព័ន្ធផ្សព្វផ្សាយព័ត៌មាននៅកម្ពុជា។

ចំណែក ប្រធានក្លិបអ្នកកាសែតកម្ពុជា លោក ប៉ែន បូណាវិញ បានលើកឡើងថា ប្រព័ន្ធបច្ចេកវិទ្យាឌីជីថល បានជំរុញឲ្យបណ្ដាញសារព័ត៌មានអនឡាញរីកដុះដាលយ៉ាងច្រើននៅក្នុងប្រទេសកម្ពុជា ដែលធានាឲ្យ ប្រជាពលរដ្ឋទទួលបានព័ត៌មានយ៉ាងសំបូរបែប និងឆាប់រហ័សទាន់ពេលវេលា។ ប៉ុន្តែទន្ទឹមនឹងនេះ លោក ថា ប្រព័ន្ធឌីជីថល ក៏បានបង្កបញ្ហាប្រឈមច្រើនយ៉ាងគួរឲ្យព្រួយបារម្ភផងដែរ នៅក្នុងវិស័យសារព័ត៌មាននៅកម្ពុជា ជាពិសេស សារព័ត៌មានបោះពុម្ពផ្សាយតាមបែបប្រពៃណី វិទ្យុ និងទូរទស្សន៍ជាដើម ។

សម្រាប់លោក​ ប៉ែន បូណា ថ្វីត្បិតតែប្រព័ន្ធឌីជីថលបង្កលក្ខណៈឲ្យមានសារព័ត៌មានសំបូរបែបក៏ពិតមែន  ប៉ុន្តែមានច្រើនតែបរិមាណប៉ុណ្ណោះ ឯគុណភាព វិជ្ជាជីវៈនៅមានកម្រិតនៅឡើយ។ ប្រការនេះ ជាហេតុនាំឲ្យមានព័ត៌មានក្លែងក្លាយ ព័ត៌មានមិនច្បាស់ការ គ្មានការផ្ទៀងផ្ទាត់ កើតឡើងយ៉ាងព្រោងព្រាតនៅលើបណ្ដា​ញ​ទំនាក់ទំនងសង្គម នាពេលបច្ចុប្បន្ន។

ដោយឡែក លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា(ខេមបូចា) បានស្នើដល់រាជរដ្ឋាភិបាល បន្តផ្ដល់ការគាំទ្រដល់អ្នកសារព័ត៌មានបន្ថែមទៀត តាមរយៈការឆ្លើយតបដោយវិជ្ជមាន និងប្រសិទ្ធភាព ព្រមទាំងជួយដោះស្រាយរាល់បញ្ហាប្រឈមរបស់អ្នកសារព័ត៌មាន។ បន្ថែមពីនេះ លោក ណុប វី ស្នើដល់ថ្នាក់ដឹកនាំ មន្ត្រីគ្រប់ជាន់ថ្នាក់ ចូលរួមឲ្យកាន់តែសកម្មថែមទៀត ដើម្បីឈានដល់ការលុបបំបាត់គ្រប់ទម្រង់នៃការបៀតបៀន ជាពិសេស លើអ្នកសារព័ត៌មានជាស្រ្តី៕

អត្ថបទ ៖ ធឿន វ៉ាន់សុង