ព្រមានមិនឲ្យបាញ់មីស៊ីល ពេលនេះ កូរ៉េខាងជើង ប្តូរមកបាញ់កាំភ្លើងធំម្តង (មានវីដេអូ)

យោធាកូរ៉េខាងត្បូងនិយាយថា ប្រទេសកូរ៉េខាងជើង បានបាញ់កាំភ្លើងធំជាច្រើនគ្រាប់នៅចន្លោះម៉ោង ៨:០៧ ព្រឹកដល់ម៉ោង ១១:០៣ នាទីព្រឹកថ្ងៃអាទិត្យទី ១២ខែមិថុនា។

នេះជាការបង្ហាញសាច់ដុំយោធាមួយផ្សេងទៀត ពោលគឺកើតឡើងមួយថ្ងៃប៉ុណ្ណោះ បន្ទាប់ពីមេដឹកនាំគីម ជុងអ៊ុន ប្តេជ្ញា ពង្រឹងអំណាចយោធារបស់ប្រទេសកូរ៉េខាងជើង។

អគ្គសេនាធិការចម្រុះ មិនបានផ្តល់ព័ត៌មានលម្អិតផ្សេងទៀតទេ ប៉ុន្តែបានលើកឡើងថា ខ្លួនសម្រេចចិត្ត ចេញសេចក្តីថ្លែងការណ៍មួយនៅពេលល្ងាច ដោយសារតែការបាញ់នេះជាលក្ខណៈដូចទម្លាប់ ជាមួយនឹងរយៈចម្ងាយខ្លី និងរយៈកម្ពស់ទាប។

ការបាញ់កាំភ្លើងធំ បានកើតឡើងខណៈលោក គីម កាលពីថ្ងៃសៅរ៍ បានបង្ហាញនូវគោលដៅដើម្បីបង្កើនថាមពលយោធារបស់ប្រទេស និងការស្រាវជ្រាវការពារជាតិ ដើម្បីការពារសិទ្ធិអធិបតេយ្យភាពរបស់ប្រទេសកូរ៉េខាងជើង។

ហើយការបាញ់នេះក៏កើតឡើងផងដែរ បន្ទាប់ពីសហរដ្ឋអាមេរិក បាន​ព្រមាន​​ឆ្លើយតបម៉ឺងម៉ាត់ ប្រសិនបើ​កូរ៉េ​ខាងជើង ​សាកល្បង​អាវុធ​នុយក្លេអ៊ែរ។

អនុរដ្ឋមន្ត្រីការបរទេសអាមេរិក លោកស្រី Wendy Sherman បានប្រាប់អ្នកយកព័ត៌មានកាលពីថ្ងៃអង្គារទី០៧ខែមិថុនា បន្ទាប់ពីកិច្ចពិភាក្សាជាមួយសមភាគីកូរ៉េខាងត្បូងលោក Cho Hyun-dong ក្នុងទីក្រុង សេអ៊ូល ថា “ការសាកល្បងនុយក្លេអ៊ែរណាមួយ នឹងបំពានទាំងស្រុងលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ហើយនឹងមានការឆ្លើយតបយ៉ាងរហ័ស និងម៉ឺងម៉ាត់ ចំពោះការសាកល្បងបែបនេះ”។

លោកស្រី Sherman បន្ថែមថា “ពិភពលោកទាំងមូល នឹងឆ្លើយតបយ៉ាងម៉ឺងម៉ាត់ និងច្បាស់លាស់។ យើង​បាន​ត្រៀម​ខ្លួនរួច​ហើយ”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក ​ព្រមាន​​ឆ្លើយតបម៉ឺងម៉ាត់ ប្រសិនបើ​កូរ៉េ​ខាងជើង ​សាកល្បង​អាវុធ​នុយក្លេអ៊ែរ (មានវីដេអូ)