ស្រីលង្កា ឲ្យមន្ត្រីរដ្ឋ ឈប់ថែមមួយថ្ងៃទៀតក្នុងមួយសប្តាហ៍ ដើម្បីទៅធ្វើស្រែ

ប្រទេសស្រីលង្កា បានអនុម័តឲ្យបុគ្គលិករដ្ឋទាំងអស់ មួយសប្តាហ៍ធ្វើការតែ៤ថ្ងៃប៉ុណ្ណោះ ដើម្បីជួយពួកគេ ឲ្យទប់ទល់នឹងកង្វះខាតប្រេងឥន្ធនៈធ្ងន់ធ្ងរ និងលើកទឹកចិត្តពួកគេឲ្យទៅធ្វើស្រែ ខណៈប្រជាជាតិមួយនេះ កំពុងតស៊ូជាមួយវិបត្តិហិរញ្ញវត្ថុអាក្រក់បំផុតក្នុងរយៈពេលជាច្រើនទសវត្សរ៍ចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រីលង្កា មានបុគ្គលិករដ្ឋប្រហែលមួយលាននាក់ ហើយប្រទេសនេះកំពុងរងគ្រោះដោយកង្វះខាតការប្តូររូបិយប័ណ្ណបរទេសយ៉ាងធ្ងន់ធ្ងរ ដែលជាហេតុធ្វើឲ្យខ្លួន ជួបប្រទះផលពិបាកក្នុងការចំណាយសម្រាប់ការនាំចូលប្រេងឥន្ធនៈ អាហារ និងថ្នាំពេទ្យ។

ប្រជាជនយ៉ាងច្រើន ក្នុងចំណោមប្រជាជន ២២ លាននាក់របស់ប្រទេសនេះ បានចំណាយពេលច្រើនម៉ោង តម្រង់ជួរនៅតាមស្ថានីយ៍ប្រេងឥន្ធនៈ ហើយបាននិងកំពុងស៊ូទ្រាំជាមួយការដាច់ចរន្តអគ្គិសនី ច្រើនខែមកហើយ។

គណៈរដ្ឋមន្ត្រីរបស់ប្រទេសស្រីលង្កា កាលពីល្ងាចថ្ងៃចន្ទទី១៣ខែមិថុនា បានអនុម័តលើសំណើ ឲ្យបុគ្គលិករដ្ឋ ឈប់សម្រាករៀងរាល់ថ្ងៃសុក្រសម្រាប់រយៈពេល៣ខែបន្ទាប់ ដោយសារតែកង្វះខាតប្រេងឥន្ធនៈ បណ្តាលឲ្យការធ្វើដំណើរមានភាពលំបាក និងជំរុញឲ្យពួកគេធ្វើស្រែចម្ការផងដែរ។

ការិយាល័យព័ត៌មានរបស់រដ្ឋាភិបាល បាននិយាយនៅក្នុងសេចក្តីថ្លែងការណ៍មួយថា “នោះហាក់ដូចជាសមរម្យ ក្នុងការអនុញ្ញាតឲ្យមន្រ្តីរដ្ឋាភិបាលឈប់សម្រាកថែមមួយថ្ងៃទៀត ដើម្បីចូលរួមក្នុងសកម្មភាពកសិកម្មនៅវាលស្រែ ក្រោយផ្ទះរបស់ពួកគេ ឬកន្លែងផ្សេងទៀតដែលជាដំណោះស្រាយចំពោះកង្វះខាតស្បៀងអាហារ”។

អង្គការសហប្រជាជាតិកាលពីសប្តាហ៍មុន បានព្រមានអំពីវិបត្តិមនុស្សធម៌ដែលកំពុងកើតមាន ហើយខ្លួនគ្រោងនឹងផ្តល់ប្រាក់ចំនួន ៤៧លានដុល្លារអាមេរិក ដើម្បីជួយដល់ជនងាយរងគ្រោះជាងមួយលាននាក់។

ការ​ធ្លាក់​ចុះ​រូបិយប័ណ្ណ ការ​ឡើង​ថ្លៃ​ទំនិញ​ជា​សកល និង​គោល​នយោបាយ​​ហាម​ប្រើ​ជីគីមី​បាន​ជំរុញ​អតិផរណា​អាហារ​ដល់ ​៥៧​ភាគរយ​ក្នុង​ខែ​មេសា៕

ប្រែសម្រួល៖ Vann Vann

ប្រភព៖ CNA

ចុចអាន៖ ស្រីលង្កា អង្វរឲ្យកសិករ ធ្វើស្រែបន្ថែមទៀត ខណៈបញ្ហាកង្វះខាតស្បៀងអាហារ ធ្ងន់ធ្ងរទៅៗ