ព័ត៌មានជាតិ

លោក ញឹក ប៊ុនឆៃ៖ អ្នកសង្កេតការណ៍ជាតិ អន្តរជាតិ មិនបានរៀបចំឱ្យនិយាយល្អពីកម្ពុជាទេ

បានផុស

៤ years មុន

នៅ

ថ្ងៃសៅរ៍ ២៥ មិថុនា ២០២២

ដោយ

ប្រធានគណបក្ស ខ្មែររួបរួមជាតិ លោក ញឹក ប៊ុនឆៃ លើកឡើងថា អ្នកសង្កេតការណ៍ជាតិ អន្តរជាតិ ដែលបានចូលរួមសង្កេតមើលដំណើការបោះឆ្នោតជ្រើរើសក្រុមប្រឹក្សាឃុំ-សង្កាត់ អាណត្តិទី៥ នៅកម្ពុជាកាលពីថ្មីៗនេះ មិនមែនជាមនុស្សដែលត្រូវបានគេរៀបចំ ដើម្បីឱ្យនិយាយល្អពីកម្ពុជានោះទេ ពីព្រោះបើពិនិត្យមើលទៅ បរិយាកាស នៃការបោះឆ្នោត ឃុំ សង្កាត់ នោះ វាដូចការវាយតម្លៃរបស់ពួកគេមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ញឹក ប៊ុនឆៃ មានប្រសាសន៍ប្រាប់ “កម្ពុជាថ្មី” ថា៖ “ខ្ញុំយល់ថា អ្នកសង្កេតការណ៍ហ្នឹង វាអាចជាអ្នកសង្កេតការណ៍ត្រឹមត្រូវ ពីព្រោះមើលមែនទែនទៅ វាឃើញបរិយាកាសហ្នឹង វាអ៊ីចឹងមែន វាអត់មានឃើញអំពើហិង្សាអីដូចមុនៗទេ ឬមានស្លាប់មនុស្សមានស្អីអ៊ីចឹង វាអត់មានទេ ហើយដំណើរការឃោសនានោះទៀត វាដំណើរការទៅដោយរលូន”។

ទោះជាយ៉ាងណា លោក ញឹក ប៊ុនឆៃ បានអះអាងថា មានករណីមិនប្រក្រតីខ្លះដែរ តែសម្រាប់គណបក្សរបស់លោក ភាពមិនប្រក្រតីទាំងនោះ ត្រូវបានដោះស្រាយចប់មិនមានអ្វីជាដុំកំភូនទេ ដោយសាតែក្រុមការងារគណបក្សរបស់លោកមានទំនាក់ទំនងល្អជាមួយ អាជ្ញាធរភូមិ ឃុំ ស្រុក ខេត្ត ជាដើម ហើយក៏មានទំនាក់ទំនងគ្នាល្អជាមួយ SEC និង PEC ដែរ។

លោកថា គណបក្សរបស់លោក មានប្រមាណ ១០ករណីដែរ ប៉ុន្តែត្រូវបានដោះស្រាយចប់។ លោកបញ្ជាក់ទៀតថា កន្លែងខ្លះវាជាកំហុសក្រុមការងាររបស់លោក ដោយសារគណបក្សលោកជាគណបក្សថ្មី ក្រោយពីមានបញ្ហាមក រចនាសម្ព័ន្ធមួយចំនួនត្រូវបានបាត់បង់ ហើយត្រូវរៀបចំថ្មី ដូច្នេះគាត់មិនសូវយល់អំពីនីតិវិធីបោះឆ្នោត តែករណីខ្លះ ក៏មកពី SEC និង PEC ដែរ គាត់នៅខ្ចី ឬនៅថ្មី មិនសូវយល់នីតិវិធីធ្វើការ តែនៅពេលមានឧបសគ្គ ការដោះស្រាយមានការយោគយល់គ្នា។

សម្រាប់បរិយាកាសទាំងមូល នៃការបោះឆ្នោតកន្លងមកនេះ លោក ញឹក ប៊ុនឆៃ បានអះអាងថា មិនមានបញ្ហាអ្វីធ្ងន់ធ្ងរនោះទេ ទោះបីជាមានការចោទប្រកាន់ពីគណបក្សខ្លះ ទាក់ទងទៅនឹងការទិញបេក្ខជន អំពើហិង្សា ឬការគាបសង្កត់ណាមួយក៏ដោយ។ លោកថា រាល់ការបោះឆ្នោតតែងតែមានបន្តិចបន្តួច បក្សនេះទិញបក្សនោះ បក្សនោះទិញបក្សនេះ ចៀសមិនផុតទេ ប៉ុន្តែករណីនេះ វាមានតិចតួចណាស់៕

អត្ថបទ៖ កោះកែវ