អូមីក្រុងពូជថ្មី ២ ប្រភេទកំពុងគ្របដណ្ដប់ករណីឆ្លងកូវីដនៅ ថៃ

យោងតាមនាយកដ្ឋានវេជ្ជសាស្ត្រថៃបានឲ្យដឹងថា វីរុសអូមីក្រុងក្លាយពូជប្រភេទ BA.4 និង BA.5 នឹងក្លាយជាវីរុសកូវីដបំប្លែងខ្លួនគ្របដណ្ដប់នៅក្នុងប្រទេសថៃនាពេលឆាប់ៗនេះ ប៉ុន្តែរហូតមកដល់ពេលនេះវាមិនទាន់បង្ហាញពីការបណ្តាលឲ្យអ្នកឆ្លងឈឺធ្ងន់ធ្ងរនៅឡើយទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Supakit Sirilak ប្រធាននាយកដ្ឋានបាននិយាយនៅថ្ងៃចន្ទនេះថា វីរុសអូមីក្រុងក្លាយពូជប្រភេទ BA.4 និង BA.5 បានរួមចំណែកដល់ទៅជាង ៥០ ភាគរយនៃករណីឆ្លងកូវីដថ្មីកាលពីសប្ដាហ៍មុន ហើយវានឹងជំនួសវីរុសបំប្លែងខ្លួនផ្សេងទៀតបន្តិចម្ដងៗ ដូចជា វីរុសបំប្លែងខ្លួនអូមីក្រុង និងដែលតាជាដើម ។

លោកបញ្ជាក់ថា រហូតមកដល់ពេលនេះមិនទាន់មានព័ត៌មានគ្រប់គ្រាន់ដើម្បីធ្វើការសន្និដ្ឋានអំពីភាពធ្ងន់ធ្ងររបស់វីរុសអូមីក្រុងក្លាយពូជប្រភេទ BA.4 និង BA.5 នោះទេ ប៉ុន្តែមន្រ្តីសុខាភិបាលបានសន្មត់ថា វីរុសនេះអាចឆ្លងកាន់តែខ្លាំងជាងប្រភេទដើម ។

លោកវេជ្ជបណ្ឌិត Supakit បាននិយាយថា ទោះយ៉ាងណាការការពារផ្ទាល់ខ្លួននៅតែចាំបាច់ ជាពិសេសពាក់ម៉ាសនៅពេលដែលស្ថិតក្នុងតំបន់ដែលមានមនុស្សច្រើន ខណៈកត្តាសំខាន់មួយទៀតគឺចាក់វ៉ាក់សាំងដូសជំរុញដើម្បីបង្កើនភាពស៊ាំ ។

គួរបញ្ជាក់ថា រហូតមកដល់ពេលនេះមនុស្សប្រហែល ១,០០០ នាក់នៅក្នុងប្រទេសថៃបានឆ្លងវីរុសអូមីក្រុងក្លាយពូជប្រភេទ BA.4 និង BA.5 ខណៈករណីភាគច្រើនគឺនៅទីក្រុងបាងកក ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ថៃ បញ្ជូនយន្តហោះចម្បាំងការពារដែនអាកាសពីការរំលោភបំពានរបស់ មីយ៉ាន់ម៉ា