ថៃ បញ្ជូនយន្តហោះចម្បាំងការពារដែនអាកាសពីការរំលោភបំពានរបស់ មីយ៉ាន់ម៉ា

ការប្រយុទ្ធគ្នាកាន់តែខ្លាំងរវាងយោធាមីយ៉ាន់ម៉ា និងក្រុមជនជាតិភាគតិចបានបង្កឲ្យមានភាពតានតឹងជាមួយប្រទេសថៃដែលជាអ្នកជិតខាងជុំវិញការរំលោភលើដែនអាកាសរបស់ខ្លួន ។

ពាក់ព័ន្ធនឹងបញ្ហានេះដែរ អ្នកនាំពាក្យរបស់កងទ័ពអាកាសថៃនិយាយថា កងកម្លាំងដែនអាកាសបានបញ្ជូនយន្តហោះចម្បាំង F-16 ចំនួន ២ គ្រឿង បន្ទាប់ពីយន្តហោះមីយ៉ាន់ម៉ាត្រូវបានរកឃើញហោះហើរនៅលើខេត្ត Tak របស់ប្រទេសថៃកាលពីថ្ងៃព្រហស្បតិ៍ ។

អ្នកនាំពាក្យបាននិយាយទៀតថា យន្តហោះមីយ៉ាន់ម៉ាកំពុងធ្វើការវាយប្រហារលើកងកម្លាំងជនជាតិភាគតិចដែលមានទីតាំងនៅជិតព្រំដែនមីយ៉ាន់ម៉ាជាមួយប្រទេសថៃ ហើយកងកម្លាំងទ័ពអាកាសបានបញ្ជាឲ្យជូនដំណឹងអំពីការការពារខ្លួនទៅទីក្រុងយ៉ាំងហ្គោនដើម្បីផ្តល់ការព្រមានដល់អាជ្ញាធរមីយ៉ាន់ម៉ា និងធ្វើការជាមួយពួកគេដើម្បីបញ្ចៀសឧប្បត្តិហេតុស្រដៀងគ្នានេះ ។

ចំណែកនាយករដ្ឋមន្ត្រីថៃលោក ប្រាយុទ្ធ ចាន់អូចា បាននិយាយថា មីយ៉ាន់ម៉ាក៏បានសុំទោសចំពោះឧបទ្ទវហេតុនេះផងដែរ បន្ទាប់ពីមានការពិភាក្សាគ្នារវាងភាគីទាំងពីរ ។

ជាចុងក្រោយអាជ្ញាធរថៃបញ្ជាក់ថា ពួកគេកំពុងតាមដានយ៉ាងដិតដល់នូវសកម្មភាពរបស់កងទ័ពអាកាសមីយ៉ាន់ម៉ា ហើយត្រៀមខ្លួនជាស្រេចដើម្បីធ្វើសកម្មភាព ប្រសិនបើអធិបតេយ្យភាពរបស់ប្រទេសនេះត្រូវបានរំលោភបំពាន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ឡាវ ចង់ពន្លឿនការបោះបង្គោលព្រំដែនគោកជាមួយ ថៃ ដែលនៅសល់ត្រឹម ៧ ភាគរយ