ការផ្ដល់ឋានៈបេក្ខភាព អឺរ៉ុប ដល់ អ៊ុយក្រែន ជាចំណែក “ជម្លោះភូមិសាស្ត្រ នយោបាយ” ប្រឆាំង រុស្ស៊ី

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយនៅក្នុងបទសម្ភាសន៍មួយជាមួយកាសែត Izvestia ថា ការផ្តល់ឋានៈជាបេក្ខភាពសហភាពអឺរ៉ុបដល់អ៊ុយក្រែន និងម៉ុលដាវី គឺជាផ្នែកមួយនៃ “ជម្លោះភូមិសាស្ត្រនយោបាយ” ប្រឆាំងនឹងរុស្ស៊ី ។

លោក Lavrov បានសង្កត់ធ្ងន់ថា ជាក់ស្ដែងគឺអឺរ៉ុបដែលដឹកនាំដោយទីក្រុងវ៉ាស៊ីនតោនកំពុងផ្គត់ផ្គង់អាវុធដល់រដ្ឋាភិបាលទីក្រុងកៀវ និងបានធ្វើកិច្ចសហប្រតិបត្តិការយ៉ាងជិតស្និទ្ធជាមួយអង្គការណាតូ ។

រដ្ឋមន្ត្រី​ការបរទេស​រុស្ស៊ី​រូបនេះបាន​បញ្ជាក់ទៀត​ថា “នយោបាយ​ការបរទេសសមូហភាព​របស់​លោក​ខាងលិច​គឺ​ជា​ល្ខោន​តែ​មួយ ហើយអ្វីដែលយើងហៅថា “ស្វ័យភាពជាយុទ្ធសាស្ត្រ” របស់សហភាពអឺរ៉ុប គឺមិនមានអ្វីក្រៅពីការសម្ដែងនោះទេ” ។

លោកបានបន្ថែមថា “សហគមន៍នយោបាយដែលស្នើឡើងដោយប្រធានាធិបតីបារាំងលោក Emmanuel Macron នឹងមិនធានាផលប្រយោជន៍ផ្នែកហិរញ្ញវត្ថុ ឬសេដ្ឋកិច្ចអឺរ៉ុបទេ ហើយអឺរ៉ុបនឹងទាមទារឲ្យមានសាមគ្គីភាព ក៏ដូចជាសកម្មភាពប្រឆាំងរុស្ស៊ី” ។

គួរបញ្ជាក់ថា កាលពីថ្ងៃទី ២៣ ខែមិថុនា ប្រមុខរដ្ឋ និងរដ្ឋាភិបាលនៃសហភាពអឺរ៉ុបបានអនុម័តការផ្តល់ឋានៈជាបេក្ខភាពសហភាពអឺរ៉ុបដល់អ៊ុយក្រែន និងម៉ុលដាវី ហើយក្រុមប្រឹក្សាអឺរ៉ុបនឹងចាត់វិធានការបន្ថែមទៀត បន្ទាប់ពីប្រទេសដែលចូលជាបេក្ខភាព បំពេញតាមលក្ខខណ្ឌដែលបង្កើតឡើងដោយគណៈកម្មការអឺរ៉ុប ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី បញ្ជាឲ្យយោធាបង្កើនប្រតិបត្តិការខ្លាំងឡើងៗនៅ អ៊ុយក្រែន