ក្រសួងតៀមថ្នាំអាបេត ២០០តោន សេរ៉ូមជិត ៦ម៉ឺនប្លោក ទប់ស្កាត់ការរាតត្បាតជំងឺគ្រុនឈាមទ្រង់ទ្រាយធំ

លោកវេជ្ជបណ្ឌិត ហ៊ុយ រ៉េកុល ប្រធាន មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្របានមានប្រសាសន៍នៅរសៀលថ្ងៃទី៦ ខែមករានេះថា ក្រសួងសុខាភិបាលបានតៀមថ្នាំអាបេតចំនួន ២០០តោន និងសេរ៉ូមប្រមាណជិត៦ម៉ឺនប្លោក ថ្នាំបាញ់សម្លាប់មូសជិត ៥ពាន់លីត្រ ដើម្បីទប់ស្កាត់ការរាតត្បាតជំងឺគ្រុនឈាមទ្រង់ទ្រាយធំ នៅឆ្នាំ២០២៣។

លោកវេជ្ជបណ្ឌិត ហ៊ុយ រ៉េកុល មានប្រសាសន៍បន្តថា ជាមួយគ្នានេះ ក្រសួងបានត្រៀមសារអប់រំ ពីវិធានការការពារជំងឺគ្រុនឈាមសម្រាប់ផ្សព្វផ្សាយតាមប្រព័ន្ធបណ្តាញសង្គម វិទ្យុ អនឡាញ និងទូរទ្សសន៍ ដើម្បីបញ្ជ្រាបដល់ប្រជាពលរដ្ឋបានយល់ដឹង ការពារកូនចៅកុំឱ្យឆ្លងជំងឺគ្រុនឈាម ដោយសារឆ្នាំនេះកៀកនឹងមានផ្ទុះជំងឺគ្រុនឈាមទ្រង់ទ្រាយធំ ខណៈការផ្ទុះចុងក្រោយនៅឆ្នាំ២០១៩។

លោកវេជ្ជបណ្ឌិត លាង ឬទ្ធា ប្រធាន កម្មវិធីជាតិប្រយុទ្ធនឹងជំងឺគ្រុនឈាម មានប្រសាសន៍ថា នៅឆ្នាំ២០២៣នេះ ស្ថានភាពជំងឺគ្រុនឈាមអាចនឹងកើនឡើងដល់ជាង ២ម៉ឺនករណី ខ្ពស់ជាងឆ្នាំ២០២២ទៅទៀតដែលមានករណីជំងឺគ្រុនឈាមជាង ១២ ៥០០ករណី (ស្លាប់ចំនួន ១៩ ករណី) មានការកើនឡើងជាង៦ដង បើប្រៀបធៀបនឹងឆ្នាំ២០២១កន្លងទៅដែលមានចំនួន ១ ៨១១ករណី (ស្លាប់ចំនួន ៨ករណី)។

លោកវេជ្ជបណ្ឌិត  ហ៊ុយ រ៉េកុល បានអំពាវនាវដល់អាណាព្យាបាល មាតាបិតា កុមារាកុមារីគ្រប់រូប រួមទាំងអាជ្ញាធរមូលដ្ឋានត្រូវចូលរួមកំចាត់ដង្កូវទឹកនៅតាមទីកន្លែងដែលមានទឹកដក់ដូចជា ពាង អាងទឹក ថូផ្កា ចានទ្រជើង ក្រឡ ខាប់ ជាដើម និងអាជីវករ និងម្ចាស់ជីវកម្មទាំងឡាយ ដែលប្រកបរបរពាក់ព័ន្ធនឹងសំបកកង់ឡានម៉ូតូ ត្រូវគ្រប់គ្រងសំបកកង់ទាំងនេះឱ្យមានសុវត្ថិភាព ជៀសផុតពីការដក់ទឹកដោយមិនត្រូវទុកចោលពាសវាលពាសកាល បង្កើតបានជាប្រភពកកើត និងជម្រកមូសខ្លាដ៏គ្រោះថ្នាក់បំផុត ដែលអំណោយដល់ការចម្លងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា។

លោកវេជ្ជបណ្ឌិត បានណែនាំឱ្យកុមារស្លៀកពាក់ខោអាវដៃវែងជើងវែង និងសម្រាន្តក្នុងមុងជាប្រចាំទាំងថ្ងៃទាំងយប់ មិនត្រូវអង្គុយលេងនៅជិតទីកន្លែងងងឹត និងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញ៉ាប់នាំអ្នកជំងឺទៅរកសេវាពិនិត្យនិងព្យាបាលរបស់រដ្ឋ ដូចជាមណ្ឌលសុខភាព និងមន្ទីរពេទ្យ ដែលនៅជិតបំផុត និងកុំសាកល្បងព្យាបាលជំងឺ ដោយខ្លួនឯង ឬពន្យារពេលតាមដានព្យាបាលអ្នកជំងឺនៅសេវាឯកជនដែលគ្មានសមត្ថភាពផ្នែកជំងឺគ្រុនឈាមឱ្យសោះ ព្រោះអាចធ្វើឱ្យកុមារស្លាប់បាត់បង់ជីវិតបាន ខណៈកុមារដែលស្លាប់កន្លងមកដោយសារការបញ្ជួនអ្នកជំងឺទៅមន្ទីរពេទ្យរដ្ឋមានការយឺតយ៉ាវ៕

អត្ថបទ៖ សំអឿន