មហាសេដ្ឋី Jack Ma បោះបង់តំណែងជាអ្នកគ្រប់គ្រងក្រុមហ៊ុន Ant Group

ក្រុមហ៊ុន Ant Group កាលពីថ្ងៃសៅរ៍បានប្រកាសថា លោក Jack Ma ដែលជាស្ថាបនិកក្រុមហ៊ុន fintech យក្សរបស់ចិន សម្រេចចិត្តឈប់គ្រប់គ្រងក្រុមហ៊ុនទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Ant Group គឺជាសាខារបស់ក្រុមហ៊ុនពាណិជ្ជកម្មអេឡិចត្រូនិកយក្ស Alibaba Group ដែលបង្កើតឡើងដោយ Ma និងដំណើរការកម្មវិធីទូទាត់ប្រាក់តាមទូរស័ព្ទ Alipay ជាមួយនឹងអ្នកប្រើប្រាស់ជាងមួយពាន់លាននាក់។

ដោយកាលពីខែ​ វិច្ចិកា ឆ្នាំ​ ២០២០ កន្លងទៅ ក្រុមហ៊ុននេះ បានលុបចោលភាគហ៊ុន​ IPO ជាង ៣៧ពាន់លានដុល្លាររបស់ខ្លួន បន្ទាប់ពីនិយ័តករហិរញ្ញវត្ថុរដ្ឋាភិបាលចិន ណែនាំឱ្យធ្វើការកែតម្រូវរុះរើរចនាសម្ព័ន្ធផ្លាកយីហោចេញ។

ដោយឡែក ការបោះបង់ក្រុមហ៊ុនរបស់លោក Ma បានធ្វើ​​ឱ្យអ្នកវិភាគមួយចំនួនយល់ឃើញថា វាជាផ្លូវមួយដើម្បីឱ្យក្រុមហ៊ុនអាចស្តារ IPO របស់ខ្លួនឡើងវិញបាន ខណៈក្រុមអ្នកសង្កេតការណ៍ផ្សេងទៀត​ និយាយថា ក្រុមហ៊ុននេះទំនងជាធ្វើតាមការចង់បានរបស់អាជ្ញាធរចិន ដែលបានប្រាប់ក្រុមហ៊ុនឱ្យរុះរើអាជីវកម្មរបស់ខ្លួន។

ទន្ទឹមនឹងនោះ រដ្ឋាភិបាលចិនបានពង្រឹងជំហររបស់ខ្លួន បន្ទាប់ពីក្រុមហ៊ុន Ant Group បានពង្រីកអាជីវកម្មរបស់ខ្លួនយ៉ាងឆាប់រហ័សទៅកាន់ការផ្តល់ប្រាក់កម្ចី និងការធានារ៉ាប់រងខ្នាតតូច ដោយប្រើប្រាស់មូលដ្ឋានអតិថិជនដ៏ធំរបស់ខ្លួន។

គួរបញ្ជាក់ថា ក្រុមហ៊ុន Ant Group ត្រូវបានរដ្ឋាភិបាលចិនបង្ខំឱ្យលុបចោលការចុះបញ្ជីទីផ្សាររបស់ខ្លួនភ្លាមៗ បន្ទាប់ពីលោក Ma បានរិះគន់និយតករហិរញ្ញវត្ថុរបស់ប្រទេសចិនក្នុងខែតុលា ឆ្នាំ ២០២០៕

ប្រែសម្រួលដោយ៖ នាង រតនៈ

ប្រភព៖ NHK