វិនិយោគិនជប៉ុនមានគម្រោងបង្កើតរោងចក្រកែច្នៃស្វាយចន្ទីនៅដីដែលបានដោះមីនរួច

ក្រុមហ៊ុនជប៉ុន Top planning Japan មានគម្រោងបង្កើតរោងចក្រកែច្នៃស្វាយចន្ទីនៅដីចម្ការមីនក្នុងខេត្តបាត់ដំបង ក្រោយតំបន់នេះត្រូវបានដោះមីនហើយរួចរាល់។

លោក ហេង រតនា អគ្គនាយកស៊ីម៉ាក់ បានស្វាគមន៍ និងគាំទ្រចំពោះគម្រោងរបស់ក្រុមហ៊ុនជប៉ុនក្នុងការចូលរួមជំរុញដល់ការអភិវឌ្ឍសេដ្ឋកិច្ចនៅអតីតតំបន់ចម្ការមីនកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) នៅថ្ងៃទី៨ ខែកុម្ភៈនេះ លោក Tetsuo Murayama អគ្គនាយកក្រុមហ៊ុន Top planning Japan បានស្នើសុំកិច្ចសហការរួមគ្នាជាមួយអង្គភាពស៊ីម៉ាក់ ដើម្បីប្រែក្លាយដីចម្ការមីនកម្ពុជាទៅជាដីអភិវឌ្ឍន៍លើដំណាំកសិ-ឧស្សាហកម្ម នៅពេលដីចម្ការមីនទាំងនោះត្រូវបានបោសសម្អាត និងដោះមីនរួចរាល់។

ពាក់ព័ន្ធនឹងសំណើនេះ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានស្វាគមន៍ និងគាំទ្រយ៉ាងពេញទំហឹងចំពោះបំណងចូលរួមអភិវឌ្ឍន៍នៅអតីតតំបន់មីនរបស់កម្ពុជា ជាពិសេសគម្រោងបង្កើតរោងចក្រកែច្នៃស្វាយចន្ទី។ លោក បានបង្ហាញក្ដីសង្ឃឹមថា អ្នកវិនិយោគិនជប៉ុនដែលមានភាពច្នៃប្រឌិតខ្ពស់នឹងជួយកែច្នៃឲ្យស្វាយចន្ទីកម្ពុជាមានតម្លៃខ្ពស់លើទីផ្សារអន្តរជាតិ។

លោក ហេង រតនា បានលើកឡើងថា គម្រោងរបស់ក្រុមហ៊ុនជប៉ុន នាពេលនេះ គឺស្របជាមួយនឹងគោលនយោបាយរបស់រាជរដ្ឋាភិបាលកម្ពុជា ដែលចង់ឲ្យមានការប្រើប្រាស់ឲ្យលទ្ធផលនូវផ្ទៃដីចម្ការមីនដែលបានបោសសម្អាតរួចរាល់ តាមរយៈការអភិវឌ្ឍផ្នែកសេដ្ឋកិច្ចចំពោះប្រជាពលរដ្ឋ ហើយប្រែក្លាយពីផ្ទៃដីចម្ការមីនទៅជាផ្ទៃដីសន្តិភាពប្រកបដោយសុវត្ថិភាព និងការអភិវឌ្ឍ។

បើតាមលោក ហេង រតនា រយៈពេល៣០ឆ្នាំកន្លងទៅនេះ អង្គភាពស៊ីម៉ាក់បានបោសសម្អាត និងដោះមីន ក៏ដូចជាគ្រាប់យុទ្ធភ័ណ្ឌមិនទាន់ផ្ទុះចំនួនប្រមាណ ៣លានគ្រាប់ លើផ្ទៃដីសរុបប្រមាណ ២ពាន់ម៉ែត្រក្រឡានៅទូទាំងប្រទេសកម្ពុជា។ ដូច្នេះ ក្នុងនាមជាប្រតិបត្តិករដោះមីន លោក ហេង រតនា ពិតជាចង់ឃើញដីដែលមានបញ្ហាដោយសារគ្រាប់មីនប្រែក្លាយទៅជាដីមានសុខសុវត្ថិភាពដែលគ្រប់ដណ្ដប់ដោយដំណាំយុទ្ធសាស្ត្រនានា ដើម្បីចូលរួមចំណែកជំរុញកំណើនសេដ្ឋកិច្ចរបស់កម្ពុជា៕

ដោយ៖ ធឿន វ៉ាន់សុង