ទីបំផុត រថក្រោះខ្លារខិន Leopard 2 ទៅដល់ដៃ អ៊ុយក្រែន ហើយ

រថក្រោះខ្លារខិន Leopard 2 កញ្ចប់ដំបូងដែលផលិត​ដោយ​អាល្លឺម៉ង់ បានទៅដល់ដៃប្រទេស​អ៊ុយក្រែនហើយ ខណៈប្រទេសប៉ូឡូញបានប្រគល់ជូនចំនួន ៤ គ្រឿង នៅថ្ងៃខួបគម្រប់ ១ ឆ្នាំនៃប្រតិបត្តិការសឹករបស់រុស្ស៊ី ។

នៅក្នុងរូបភាពចាប់ដៃគ្នាជាមួយនឹងលោកនាយករដ្ឋមន្ត្រីប៉ូឡូញ Mateusz Morawiecki, សមភាគីអ៊ុយក្រែនលោក Denys Shmyhal បានបង្ហោះនៅលើបណ្ដាញ Twitter ថា “យើងសូមអរគុណចំពោះប៉ូឡូញសម្រាប់ការសម្រេចចិត្តដែលនាំឲ្យអ៊ុយក្រែនខិតទៅជិតជ័យជម្នះ” ។

នៅពេលតែមួយនោះដែរ ប្រទេសអាល្លឺម៉ង់ក៏បានប្រកាសនឹងផ្ដល់រថក្រោះប្រយុទ្ធ Leopard 2 ចំនួន ៤ គ្រឿងទៀតផងដែរ បន្ថែមលើ ១៤ គ្រឿងដែលបានសន្យាកាលពីខែមុន ។

ទន្ទឹមនោះ អាល្លឺម៉ង់ក៏​មាន​បំណង​បញ្ជូន​កងវរសេនាតូច​រថក្រោះ​ចំនួន​ ២ អង្គភាពទៅឲ្យអ៊ុយក្រែនផងដែរ ដែល​ក្នុង​មួយ​កងៗ​មានរថក្រោះ ​៣១ ​គ្រឿង ខណៈក៏​អំពាវនាវ​ឲ្យប្រទេស​អឺរ៉ុប​ផ្សេងទៀត​សហការធ្វើបែបនេះដូចគ្នា ។

គួរបញ្ជាក់ថា គិតត្រឹមពេលនេះ ប្រតិបត្តិការសឹករបស់រុស្ស៊ីលើអ៊ុយក្រែនបានឈានដល់ខួប ១ ឆ្នាំហើយ បន្ទាប់ពីលោកប្រធានាធិបតី Vladimir Putin ប្រកាសបើកការវាយលុកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ដាក់លក្ខខណ្ឌ ២ យ៉ាង បើចង់បានសន្តិភាពនៅ អ៊ុយក្រែន