រុស្ស៊ី ដាក់លក្ខខណ្ឌ ២ យ៉ាង បើចង់បានសន្តិភាពនៅ អ៊ុយក្រែន

អនុរដ្ឋមន្ត្រីការបរទេសរុស្ស៊ី លោក Mikhail Galuzin បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា ការពិភាក្សារកសន្តិភាពនៅអ៊ុយក្រែនអាចនឹងប្រព្រឹត្តទៅបាន លុះត្រាតែបណ្ដាប្រទេសលោកខាងលិច និងរដ្ឋាភិបាលទីក្រុងកៀវទម្លាក់អាវុធចុះ ឬសុំចុះចាញ់ និងបញ្ឈប់ការបាញ់ផ្លោងលើទីក្រុងរុស្ស៊ី ។

អ្នកការទូតជាន់ខ្ពស់រូបនេះបានកត់សម្គាល់ថា “ប្រសិនបើលោកខាងលិច និងទីក្រុងកៀវ ចង់អង្គុយនៅតុចរចា ពួកគេគួរតែបញ្ឈប់ការបាញ់ផ្លោងកាំភ្លើងធំលើទីក្រុងនានារបស់រុស្ស៊ី ហើយដាក់អាវុធចុះ ។ បន្ទាប់ពីនោះ វានឹងអាចធ្វើការពិភាក្សាដោយផ្អែកលើការពិតនៃភូមិសាស្ត្រនយោបាយថ្មី” ។

កន្លងមក អ្នកនាំពាក្យវិមានក្រឹមឡាំង លោក Dmitry Peskov ក៏បានលើកឡើងផងដែរថា លោកខាងលិចមិនបង្ហាញការត្រៀមខ្លួនណាមួយសម្រាប់គំនិតផ្តួចផ្តើមសន្តិភាពលើស្ថានភាពនៅអ៊ុយក្រែននោះទេ ។

ជាពិសេស ប្រធានាធិបតីអ៊ុយក្រែន លោក Volodymyr Zelensky កាលពីខែតុលាកន្លងទៅ បានចេញច្បាប់ហាមឃាត់រាល់កិច្ចពិភាក្សាជាមួយទីក្រុងមូស្គូ ដោយបញ្ជាក់ថា លោកមិនចាប់អារម្មណ៍ក្នុងការធ្វើអន្តរកម្មជាមួយសមភាគីរុស្ស៊ីលោក Vladimir Putin នោះទេ ។

គួរបញ្ជាក់ថា គិតត្រឹមពេលនេះ ប្រតិបត្តិការសឹករបស់រុស្ស៊ីលើអ៊ុយក្រែនបានឈានដល់ខួប ១ ឆ្នាំហើយ បន្ទាប់ពីលោក Putin ប្រកាសបើកការវាយលុកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អ៊ុយក្រែន អះអាងថា រុស្ស៊ី ទើបតែប្រើមីស៊ីលជំនាន់ឆ្នាំ ៦០ ប៉ុណ្ណោះ (មានវីដេអូ)