លោក គីម ជុងអ៊ុន បញ្ជាឲ្យត្រៀមបាញ់នុយក្លេអ៊ែរ ប្រឆាំងអាមេរិក និងកូរ៉េខាងត្បូង

ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទទី២០ ខែមីនាថា មេដឹកនាំកូរ៉េខាងជើង លោក គីម ជុងអ៊ុន បានបញ្ជាឲ្យប្រទេសកូរ៉េខាងជើង ត្រៀមខ្លួនវាយប្រហារនុយក្លេអ៊ែរនៅពេលណាមួយដើម្បីរារាំងសង្គ្រាម។ លោកបានចោទប្រកាន់សហរដ្ឋអាមេរិក និងកូរ៉េខាងត្បូងថា បានពង្រីកសមយុទ្ធយោធារួមគ្នាពាក់ព័ន្ធនឹងទ្រព្យសម្បត្តិនុយក្លេអ៊ែររបស់អាមេរិក។

បញ្ជារបស់លោក គីម កើតឡើងចំពេលដែលប្រទេសមួយនេះ ធ្វើសមយុទ្ធក្នុងគោលបំណងពង្រឹង “ការទប់ស្កាត់សង្គ្រាម និងសមត្ថភាពវាយប្រហារនុយក្លេអ៊ែរ” របស់ខ្លួន កាលពីថ្ងៃសៅរ៍ និងថ្ងៃអាទិត្យ ដើម្បីផ្ញើសារព្រមានខ្លាំងៗប្រឆាំងនឹងសម្ព័ន្ធមិត្តទាំង២។

នៅក្នុងសមយុទ្ធនោះ មីស៊ីលផ្លោងដែលបំពាក់ដោយក្បាលគ្រាប់នុយក្លេអ៊ែរក្លែងក្លាយ បានហោះចម្ងាយ៨០០គីឡូម៉ែត្រ មុនពេលបាញ់ដល់គោលដៅនៅរយៈកម្ពស់៨០០ម៉ែត្រ ក្រោមសេណារីយ៉ូនៃការវាយប្រហារនុយក្លេអ៊ែរយុទ្ធសាស្ត្រ។

លោក គីម ដែលមើលការខុសត្រូវលើការធ្វើតេស្ត បាននិយាយថា សមយុទ្ធនេះបានធ្វើឲ្យប្រសើរឡើងនូវសមត្ថភាពសង្គ្រាមជាក់ស្តែងរបស់យោធា និងបានគូសបញ្ជាក់ពីតម្រូវការដើម្បីធានានូវជំហរត្រៀមខ្លួន សម្រាប់ការវាយប្រហារនុយក្លេអ៊ែរជាបន្ទាន់ និងលើសលប់តាមរយៈសមយុទ្ធបែបនេះ។

KCNA បានដកស្រង់សម្តីរបស់លោកគីមដែលនិយាយថា “ស្ថានភាពបច្ចុប្បន្ន ដែលសត្រូវកាន់តែធ្វើសកម្មភាពសម្រាប់ការឈ្លានពានប្រឆាំងនឹងកូរ៉េខាងជើង គឺទាមទារជាបន្ទាន់ឲ្យកូរ៉េខាងជើង ពង្រឹងការកំញើញសង្គ្រាមនុយក្លេអ៊ែររបស់ខ្លួន”។

លោកបានបន្ថែមថា “កម្លាំងនុយក្លេអ៊ែររបស់កូរ៉េខាងជើង នឹងរារាំង រៀបចំ ហើយគ្រប់គ្រងចលនានិងការញុះញង់ដែលមិនប្រុងប្រយ័ត្នរបស់សត្រូវ ជាមួយនឹងការត្រៀមខ្លួនធ្វើសង្គ្រាមខ្ពស់ ហើយអនុវត្តបេសកកម្មដ៏សំខាន់របស់ខ្លួនដោយមិនស្ទាក់ស្ទើរ ក្នុងករណីដែលស្ថានភាពគ្រប់គ្រងលែងបាន”។

គួរបញ្ជាក់ជាថ្មី កូរ៉េ​ខាង​ជើង ​បាន​បញ្ចេញ​ប្រតិកម្ម​យ៉ាង​ក្ដៅ​គគុក ​ចំពោះ​សមយុទ្ធ​យោធា​រួម​គ្នា​រវាង​កូរ៉េ​ខាង​ត្បូង និង​អាមេរិក ដោយ​ហៅ​ពួកគេ​ថា​ជា​ការ​ហាត់សម​ ដើម្បីវាយលុក​ប្រឆាំង​នឹង​ខ្លួន៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើង បាញ់មីស៊ីលមួយគ្រាប់ ចំពេល កូរ៉េខាងត្បូងនិងអាមេរិក ធ្វើសមយុទ្ធ