ប្រទេសជាង ៤០ គាំទ្រតុលាការ ICC ស៊ើបអង្កេតឧក្រិដ្ឋកម្មសង្គ្រាមនៅ អ៊ុយក្រែន ក្រោយ រុស្ស៊ី ព្រមានបាញ់នុយក្លេអ៊ែរ

ប្រទេសជាង ៤០ បានឯកភាពគាំទ្រការស៊ើបអង្កេតរបស់តុលាការឧក្រិដ្ឋកម្មអន្តរជាតិ (ICC) ពាក់ព័ន្ធនឹងករណីឧក្រិដ្ឋកម្មសង្គ្រាមរបស់រុស្ស៊ីនៅក្នុងប្រទេសអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលជួបប្រជុំគ្នានៅទីក្រុងឡុងដ៍ ប្រទេសអង់គ្លេស, លោក Karim Khan ប្រធានរដ្ឋអាជ្ញា ICC បានកត់សម្គាល់ថា ICC កាលពីសប្តាហ៍មុនបានចេញដីកាចាប់ខ្លួនប្រធានាធិបតីរុស្ស៊ីលោក វ្ល៉ាឌីមៀរ ពូទីន ពីបទសង្ស័យបាននិរទេស និងបញ្ជូនកុមារដោយខុសច្បាប់ទៅកាន់ប្រទេសរុស្ស៊ីពីតំបន់កាន់កាប់របស់អ៊ុយក្រែន ។

ជាការឆ្លើយតប មន្ត្រីរុស្ស៊ីបានចេញមកបញ្ជាក់ថា ការបញ្ជូនកុមារចេញពីអ៊ុយក្រែនយកទៅកាន់ប្រទេសរុស្ស៊ី គឺដើម្បីសុវត្ថិភាពផ្ទាល់ខ្លួន និងដើម្បីជួយពួកគេចេញពីតំបន់ដែលមានហានិភ័យប៉ុណ្ណោះ ។

ពាក់ព័ន្ធនឹងបញ្ហានេះដែរ លោក Khan បានលើកឡើងថា “ប្រសិនបើរុស្ស៊ីពិតជាមានចិត្តចង់ជួយកុមារទាំងនេះមែន ហេតុអ្វីបានជាមិនឲ្យលិខិតឆ្លងដែនទៅប្រទេសផ្សេងសម្រាប់ពួកគេ ហើយចាំបាច់និរទេស និងផ្ទេរពួកគេទៅកាន់ប្រទេសរុស្ស៊ីធ្វើអ្វី” ។

គួរបញ្ជាក់ថា ការឯកភាពគាំទ្រពីសំណាក់ប្រទេសជាង ៤០ ពាក់ព័ន្ធនឹងការស៊ើបអង្កេតរបស់តុលាការ ICC បានកើតឡើង ក្រោយពីអតីតប្រធានាធិបតីរុស្ស៊ីលោក Dmitry Medvedev បានព្រមានបាញ់អាវុធនុយក្លេអ៊ែរទៅលើតុលាការ ICC បន្ទាប់ពីចេញដីកាចាប់ខ្លួនលោក ពូទីន ជុំវិញឧក្រិដ្ឋកម្មសង្រ្គាមនៅអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី៖ ចៅក្រម ICC ឧស្សាហ៍មើលមេឃផង ប្រយ័ត្នអាវុធនុយក្លេអ៊ែរ ធ្លាក់លើ!