លោក សុខ ឥសាន៖ការបន្តអាណត្តិដល់អភិបាលខេត្តគឺផ្អែកលើសមត្ថភាព និងគុណសម្បត្តិ

កាលពីថ្ងៃទី១១ ខែមេសាម្សិលមិញ ព្រះមហាក្សត្រ​នៃកម្ពុជាបានត្រាស់បង្គាប់តែងតាំងមុខតំណែងអភិបាលខេត្តចំនួន ៣រូបសម្រាប់អាណត្តិទី២ ក្នុងដែនសមត្ថកិច្ចដដែល។

ការបន្តអាណត្តិការងារនេះ ត្រូវបានលោក សុខ ឥសាន អ្នកនាំពាក្យគណបក្សប្រជាជន អះអាងថា គឺធ្វើឡើងដោយផ្អែកលើសមត្ថភាព និងគុណសម្បត្តិរបស់មន្ត្រីទាំង៣រូបនេះ។

ការអះអាងរបស់លោក សុខ ឥសាន គឺធ្វើឡើងបន្ទាប់ពីក្រុមប្រឆាំងបានរិះគន់លើការតែងតាំងនេះ ហើយលើកឡើងថា ការបន្តមុខតំណែងដល់លោក គួច ចំរើន ជាអភិបាលខេត្តព្រះសីហនុ លោក អ៊ុំ រាត្រី ជាអភិបាលខេត្តបន្ទាយមានជ័យ និងលោក អ៊ុន ចាន់ដា ជាអភិបាលខេត្តកំពង់ចាម នាពេលនេះ គឺគ្រាន់តែដើម្បីពង្រឹងអំណាចរបស់គណបក្សប្រជាជនកម្ពុជាប៉ុណ្ណោះ។

ជុំវិញការលើកឡើងបែបនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឆ្លើយតបដូច្នេះថា៖ «ជាការពិតហើយ បើមិនដើម្បីពង្រឹងអំណាចទេប្រហែលជាគេដាក់មនុស្សផ្ដេសផ្ដាសហើយ»។ ក្នុងន័យនេះ លោក សុខ ឥសាន បានរៀបរាប់ថា ដើម្បីពង្រឹងប្រសិទ្ធភាពការងារក្នុងការបម្រើផលប្រយោជន៍ជាតិ និងប្រជាជន ទើបប្រមុខរាជរដ្ឋាភិបាលក៏ស្នើសុំការតែងតែមន្ត្រីដែលមានស្នាដៃ គុណសម្បត្តិ និងមានសមត្ថភាពពិតប្រាកដឲ្យបន្តតួនាទីជាអភិបាលខេត្តនេះ។

ដូច្នេះ នៅពេលដែលអភិបាលខេត្តទាំង៣រូបបានខិតខំប្រឹងប្រែងបម្រើផលប្រយោជន៍ជាតិ និងប្រជាជន នោះប្រជាជននឹងឆ្លើយតបមកវិញតាមរយៈការផ្ដល់ការគាំទ្រដល់គណបក្សប្រជាជនកម្ពុជា ដើម្បីឲ្យបន្តការដឹកនាំរាជរដ្ឋាភិបាលឆ្ពោះទៅរកភាពរីកចម្រើនថែមទៀត ដែលនេះហើយជាការពង្រឹងអំណាច។ នេះជាការបញ្ជាក់របស់លោក សុខ ឥសាន៕