លោក ត្រាំ ថា ពិភពលោកកំពុងជួបបញ្ហាធំបំផុតមួយ

អតីតប្រធានាធិបតីអាមេរិកលោក ដូណាល់ ត្រាំ បាននិយាយថា “ការឡើងកម្ដៅនុយក្លេអ៊ែរ” គឺជាបញ្ហាដ៏ធំបំផុតដែលពិភពលោកកំពុងប្រឈមមុខ មិនមែនជាបញ្ហានៃការឡើងកម្ដៅផែនដីនោះទេ ។

នៅក្នុងបទសម្ភាសន៍ជាមួយទូរទស្សន៍ Fox News កាលពីពេលថ្មីៗនេះ, លោក ត្រាំ បានលើកឡើងថា “បញ្ហាដ៏ធំបំផុតដែលយើងមាននៅក្នុងពិភពលោកទាំងមូលនោះមិនមែនជាការឡើងកម្ដៅផែនដីឡើយ ប៉ុន្តែវាជាការឡើងកម្ដៅនុយក្លេអ៊ែរ” ។

លោក ត្រាំ បញ្ជាក់ទៀតថា បច្ចុប្បន្នកម្ដៅនុយក្លេអ៊ែរកំពុងបង្កគ្រោះថ្នាក់គ្រប់វិនាទី ហើយយើងមិនចាំបាច់រង់ចាំរហូតដល់ ២០០ ទៅ ៣០០ ឆ្នាំខាងមុខទេ ព្រោះវាអាចកើតឡើងនៅគ្រប់ពេលទាំងអស់ ដោយសារតែមនុស្សម្នាក់ ហើយមិនចាំបាច់ខ្ញុំប្រាប់ថាជាអ្នកណានោះទេ” ។

ស្របពេលជាមួយគ្នានេះ លោក ត្រាំ ក៏បានសម្តែងការព្រួយបារម្ភអំពីសមត្ថភាពអាវុធនុយក្លេអ៊ែររបស់រុស្ស៊ី និងផលប៉ះពាល់របស់វាទៅលើអ៊ុយក្រែនផងដែរ ខណៈកាលពីពេលថ្មីៗនេះ លោកទើបតែបង្ហោះសារមួយនៅលើបណ្ដាញ TRUTH របស់លោក ព្រមានអំពីសង្គ្រាមលោកលើកទី ៣ នៅក្រោមរដ្ឋបាលរបស់លោក ចូ បៃដិន ។

គួរបញ្ជាក់ថា ចាប់តាំងពីលោក ចូ បៃដិន ចូលកាន់តំណែងមក ភាពតានតឹងបានផ្ទុះឡើងយ៉ាងខ្លាំងរវាងសហរដ្ឋអាមេរិក និងមហាអំណាចនុយក្លេអ៊ែរ ២ ផ្សេងទៀតរបស់ពិភពលោក គឺចិន និងរុស្ស៊ី ជាពិសេសគឺប្រតិបត្តិការសឹករបស់កងកម្លាំងទីក្រុងមូស្គូនៅអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ទីបំផុត FBI ចាប់ខ្លួនអ្នកធ្វើឲ្យលេចធ្លាយឯកសាររបស់មន្ទីបញ្ចកោណហើយ