ទីបំផុត FBI ចាប់ខ្លួនអ្នកធ្វើឲ្យលេចធ្លាយឯកសាររបស់មន្ទីបញ្ចកោណហើយ

ទីបំផុតប៉ូលិស FBI បានចាប់ខ្លួនអ្នកដែលធ្វើឲ្យលេចធ្លាយឯកសារកំពូលសម្ងាត់របស់មន្ទីរបញ្ចកោណ ពាក់ព័ន្ធនឹងព័ត៌មានរសើប ក៏ដូចជាការលាតត្រដាងអាថ៌កំបាំងអំពីសង្គ្រាមនៅអ៊ុយក្រែន និងសម្ព័ន្ធមិត្តរបស់អាមេរិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

FBI បានចាប់ខ្លួនលោក Jack Teixeira អាយុ ២១ ឆ្នាំជាឆ្មាំជាតិដែនអាកាសជាមួយនឹងបក្ខពួកប្រហែល ២០ នាក់ទៀត បន្ទាប់ពីបានដឹកនាំក្រុមមួយនៅលើវេទិកាប្រព័ន្ធផ្សព្វផ្សាយសង្គម Discord ជជែកគ្នាអំពីវីដេអូហ្គេម ការបាញ់កាំភ្លើង និងមនោគមវិជ្ជាប្រកាន់ពូជសាសន៍ ។

Teixeira ត្រូវ​​គេ​សង្ស័យ​ថា ​បានធ្វើឲ្យ​លេច​ធ្លាយ​ព័ត៌មានស៊ើបការណ៍​រាប់រយ​ទំព័រដែលមានឈ្មោះថា “កំពូលអាថ៌កំបាំង” ។ ឯកសារទាំងនោះមានការវាយតម្លៃអំពីសមត្ថភាពប្រយុទ្ធ និងការស៊ើបការណ៍សម្ងាត់របស់អ៊ុយក្រែនលើសម្ព័ន្ធមិត្តរបស់សហរដ្ឋអាមេរិក រួមទាំងអ៊ីស្រាអែល និងកូរ៉េខាងត្បូងផងដែរ ។

ទន្ទឹមនោះ អ្នកនាំពាក្យមន្ទីរបញ្ចកោណលោក Patrick Ryder បាននិយាយទៅកាន់អ្នកសារព័ត៌មានថា មន្ត្រីមន្ទីរបញ្ចកោណកំពុងពិនិត្យពីរបៀប និងអ្នកពាក់ព័ន្ធដែលព័ត៌មានអាថ៌កំបាំងទាំងនោះត្រូវបានចែករំលែក ។

ទោះយ៉ាងណា លោកប្រធានាធិបតី Joe Biden បាននិយាយកាលពីថ្ងៃព្រហស្បតិ៍ថា ការបំពាននេះមិនបង្ហាញពី “ផលវិបាកដ៏អស្ចារ្យ” នោះទេ ប៉ុន្តែអ្វីដែលលោក​មាន​ការ​ព្រួយ​បារម្ភនោះ គឺការលេចធ្លាយឯកសារដោយរដ្ឋាភិបាលខ្លួនឯង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន ប្រាប់មូលហេតុមិនទាន់បើកការវាយលុកទៅ រុស្ស៊ី វិញ