ក្តៅមិនធម្មតា! សីតុណ្ហភាពនៅថៃ ហក់ឡើងលើស ៥០អង្សាទៅទៀត

នាយកដ្ឋានឧតុនិយមថៃ (TMD) បានព្រមានប្រជាជនឲ្យប្រុងប្រយ័ត្នចំពោះការដាច់សរសៃឈាមខួរក្បាល ខណៈសីតុណ្ហភាពបានឡើងខ្លាំងហួស៥០អង្សាសេទៅទៀត នៅតំបន់មួយចំនួនក្នុងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

TMD និយាយថា Chonburi បានក្លាយជាទីក្រុងក្តៅបំផុតនៅភាគខាងកើតប្រទេសថៃនៅថ្ងៃអាទិត្យ ជាមួយនឹងសីតុណ្ហភាពឡើងដល់ ៥៣អង្សាសេ ចំណែកនៅទីក្រុងបាងកក សង្កាត់ដែលក្តៅជាងគេគឺ Bang Na ដោយសីតុណ្ហភាពឡើងដល់ ៥២.៧អង្សាសេ។

ដោយឡែក កន្លែងក្តៅបំផុតនៅភាគឦសានគឺស្រុក Kosum Phisai ក្នុងខេត្ត Maha Sarakham ដែលសីតុណ្ហភាពឡើងដល់ ៤៦អង្សាសេ ខណៈ Phuket នៅភាគខាងត្បូង ឡើងដល់៥១.១អង្សាសេ។

បើងាកទៅប្រទេសវៀតណាមឯណោះវិញ សីតុណ្ហភាពបានឡើងដល់កម្រិតខ្ពស់បំផុតមិនធ្លាប់មានសោះនៅក្នុងប្រវត្តិសាស្រ្ត ដោយឃុំ Hoi Xuan ក្នុងខេត្ត Thanh Hoa បានឈានដល់ ៤៤អង្សាសេ។

មជ្ឈមណ្ឌលជាតិសម្រាប់ការព្យាករឧតុនិយមវៀតណាមនិយាយថា សីតុណ្ហភាពនៅឃុំ Hoi Xuan បានបំបែកកំណត់ត្រាចាស់ ៤៣.៣ អង្សាសេកាលពីថ្ងៃទី២០ខែមេសាឆ្នាំ២០១៩ នៅស្រុក Huong Khe ក្នុងខេត្ត Ha Tinh។

ទន្ទឹមនោះ សីតុណ្ហភាពនៅស្រុក Lac Son ក្នុងខេត្ត Hoa Binh និងតំបន់មួយចំនួនក្នុងខេត្ត Nghe An កាលពីថ្ងៃសៅរ៍ ក៏បានឡើងលើស៤៣អង្សាផងដែរ។

ក្រៅពីនេះ ខេត្តចំនួន១៧ផ្សេងទៀតនៅភាគខាងជើងនិងកណ្តាល ដែលឡើងកម្តៅលើស៤០អង្សាសេ ក៏រួមមានទាំងខេត្ត Quang Tri, Lao Cai, Ha Giang, Ninh Binh, Quang Binh និង Phu Yen ផងដែរ ខណៈទីក្រុងហាណូយ ​មាន​តំបន់​ពីរ​ដែល​សីតុណ្ហភាព​ឡើង​លើស​៤០​អង្សា​សេ៕

ប្រែសម្រួល៖ Vann Vann

ប្រភព៖ Nation, VN Express

ចុចអាន៖ វៀតណាម ជួបអាកាសធាតុក្តៅខ្លាំងបំផុត មិនធ្លាប់មានសោះក្នុងប្រវត្តិសាស្រ្ត