លោកជំទាវ ហ៊ុន ម៉ាលី និងលោកជំទាវ ឌី សុខីទីឃាយុកោ ភរិយា​ឯកឧត្ដមហ៊ុន ម៉ានិត កៀរគរ​ថវិកា ៩៥០០០ដុល្លារ​ពីក្រុមហ៊ុនចំនួន៦ ​ជូន​មូលនិធិ​គន្ធបុប្ផា​កម្ពុជា

ភ្នំពេញ ៖ នៅ​ថ្ងៃ​ព្រហស្បតិ៍ ១៣​កើត ខែជេស្ឋ ឆ្នាំថោះ បញ្ច​ស័ក ព​.​ស​. ២៥៦៧ ត្រូវ​នឹង​ថ្ងៃទី​១ ខែមិថុនា ឆ្នាំ​២០២៣នេះ ដើម្បី​អបអរសាទរ​ទិវា​កុមារ​អន្តរជាតិ ១មិថុនា ក៏ដូចជាចូលរួមក្នុងយុទ្ធនាការ​ “១ម៉ឺនរៀល១ម៉ឺននាក់” សម្រាប់កុមារកម្ពុជា​របស់​មូលនិធិគន្ធបុប្ផា​កម្ពុជា​ លោកជំទាវ​ ហ៊ុន ម៉ាលី បុត្រីពៅរបស់សម្ដេចអគ្គមហាសេនាបតី​តេជោ ហ៊ុន សែន និង សម្ដេចកិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន​, លោក​ជំទាវ ឌី សុ​ខី​ទីឃាយុ​កោ ភរិយា​ឯកឧត្តម ហ៊ុន មានិត បាន​កៀរគរ​ថវិកា​បរិច្ចាគ​ពី​ក្រុម​ចំនួន​៦ មក​ប្រគល់ជូនមូលនិធិគន្ធបុប្ផាកម្ពុជាដើម្បី​រួមគ្នា​ជាមួយ​រាជរដ្ឋាភិបាល ក៏ដូចជា​មូលនិធិ​គន្ធបុប្ផា​កម្ពុជា ជួយ​រក្សា​និរន្តរភាព​នៃ​កិច្ច​ដំណើរការ​នៃ​មន្ទីរពេទ្យ​គន្ធបុប្ផា ៥​ទីតាំង នៅ​ព្រះរាជាណាចក្រ​កម្ពុជា​។

ក្រុមហ៊ុនទាំង៦នោះរួមមាន​ក្រុមហ៊ុន ម៉ា​លីន អឹ​ផាត​ម៉ិ​ន បរិច្ចាគ​ចំនួន ៣០ ០០០ ដុល្លារ​អាមេរិក​, ក្រុមហ៊ុន DYNITH COMMERCIAL Co., Ltd. ១០ ០០០ ដុល្លារ​អាមេរិក​, DyNith Manufacturing Industrial Co., Ltd. ១០ ០០០ ដុល្លារ​អាមេរិក​, ក្រុមហ៊ុន ធី​ខេ អ៊ែ​វ៉ឹ​ន្យូ (​ខេ​ម​បូ​ឌា​) Co., Ltd. ៣០ ០០០ ដុល្លារ​អាមេរិក​, GO GYM (Cambodia) Co., Ltd. ១០ ០០០ ដុល្លារ​អាមេរិក​, និង​ក្រុមហ៊ុន រិ​ន ឆាយ ផន សប ៥ ០០០ ដុល្លារ​អាមេរិក សរុបថវិកាទាំងអស់ចំនួន៩៥០០០ដុល្លារ​។

ក្នុង​ឱកាស​នោះ លោកជំទាវ និង​ក្រុមការងារ​ក៏បាន​ចុះ​សួរសុខទុក្ខ និង​ពិនិត្យ​ស្ថានភាព​ទូទៅ​នៃ​ការពិនិត្យ និង​ព្យាបាល​ទារក និង​កុមារ តាម​បន្ទប់​នីមួយៗ​ផង​ដែរ ដោយ​បាន​ជូនពរ​ឱ្យ​ពួកគេ​ឆាប់​ជាសះស្បើយ​ពី​ជំងឺ ឱ្យបាន​ឆាប់ៗ​។

មូលនិធិ​គន្ធបុប្ផា​កម្ពុជា សូម​ថ្លែងអំណរគុណ​យ៉ាង​ជ្រាលជ្រៅ​ចំពោះ​គំនិត​ផ្ដួចផ្ដើម និង​ទឹកចិត្ត​សប្បុរសធម៌​នេះ ដែល​ស​បញ្ជាក់​ឱ្យឃើញ​ពី​ស្មារតី​ខ្មែរ​ជួយ​ខ្មែរ ក្នុងការ​រួមគ្នា​នាំ​ភាព​ញញឹម​ដល់​មារ​ដែលជា​អនាគត​ដ៏​ភ្លឺស្វាង​របស់​កម្ពុជា៕