​សម្ដេចតេជោ ហ៊ុន សែន ហាមបង្ហោះរឿងសន្ដិសុខជាតិតាមហ្វេសប៊ុក​

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានព្រមានជាថ្មី ហាមដាច់ខាតយករឿង សន្ដិ​សុខ​ជាតិ មកបង្ហោះតាមហ្វេសប៊ុក បន្ទាប់ពីមានគណនីហ្វេសប៊ុកមួយចំនួនបានបង្ហោះថា យន្តយន្ត​ហោះ​គ្មានមនុស្សបើកបានចូលមកកម្ពុជា ស្របពេលដែលយន្តហោះពាណិជ្ជកម្មកំពុងហោះហើរ។

សម្ដេចតេជោ ហ៊ុន សែន មានប្រសាសន៍នៅក្នុងពិធីសំណេះសំណាល​ជាមួយកម្មករកម្មការិនីជិត ២ ម៉ឺននាក់ នៅព្រឹកថ្ងៃទី ២៩ ខែមិថុនា ឆ្នាំ ២០២៣នេះថា មិនមានវត្តមានយន្តហោះ​គ្មាន​មនុស្ស​បើក​(ដ្រូន) ចូលមកកម្ពុជានោះទេនៅយប់ថ្ងៃទី ២៨ ខែមិថុនា បន្ទាប់ពីការប្រកាសអាសន្នដាក់ពង្រាយកាំភ្លើងច្រើនដើម ប៉ុន្តែមានគណនីហ្វេសប៊ុកមួយចំនួនបានបង្ហោះថា ដ្រូនចូលមកដល់ក្រុងបានលុង​ដោយមិនគិតពីយន្តហោះពាណិជ្ជកម្ម។

សូមជំរាបថា យន្តហោះគ្មានមនុស្សបើកជាច្រើនគ្រឿន បានបង្ហោះចូលមកម្ពុជានៅខេត្តភាគឦសាននៃប្រទេសកម្ពុជា ដែលមានព្រំប្រទល់ជាប់ជាមួយប្រទេសវៀតណាម។

ក្រោយការបង្ហោះចូលដីកម្ពុជា សម្ដេចតេជោ ហ៊ុន សែន បានចេញបញ្ជារឱ្យកងទ័ពដាក់ពង្រាយកាំភ្លើងគ្រប់ធុនចាំបាញ់ទម្លាក់ដ្រូនដែលបង្ហោះចូលមកក្នុងដែនអធិបតេយ្យភាពកម្ពុជា ខណៈសម្ដេចជឿថាជាដ្រូនរបស់ក្រុមជនជាតិម៉ុងតាញ៉ាក្រោយហេតុការណ៍ផ្ទុះអាវុធនៅវៀតណាមកាលពីពាក់កណ្ដាលខែនេះ។

ក្រសួងការបរទេសកម្ពុជាចាត់ទុក ការហោះចូលដែនអាកាសកម្ពុជារបស់យន្តហោះគ្មានមនុស្សបើក គឺជាការរំលោភបំពានយ៉ាងគឃ្លើនមិនអាចអត់ឱនឱ្យបានមកលើអធិបតេយ្យ និងបូរណភាពទឹកដីកម្ពុជា។

រាជរដ្ឋាភិបាលកម្ពុជាបានប្រើសិទ្ធិការពារខ្លួន និងចាត់វិធានការយ៉ាងម៉ឺងម៉ាត់ និងសមស្របខាងផ្នែកយោធា ដើម្បីរារាំងនូវការហោះចូលនៃយន្តហោះគ្មានមនុស្សបើកក្នុងដែនអាកាសរបស់កម្ពុជា៕