សន្តិសុខសង្គម

តុលាការចេញដីកាឃុំខ្លួនមន្ត្រីនគរបាលបាញ់បោះលើមន្ត្រីគយប៉ុន្មានថ្ងៃមុន

បានផុស

៣ years មុន

នៅ

ថ្ងៃព្រហស្បតិ៍ ៦ កក្កដា ២០២៣

ដោយ

កាលពីថ្ងៃទី ០៥ ខែកក្កដា ឆ្នាំ ២០២៣ នេះ សាលាដំបូងខេត្តតាកែវ បានសម្រេចចេញដីកាបង្គាប់ឲ្យឃុំខ្លួនមន្ត្រីនគរបាលម្នាក់ ដែលផ្ទុះអាវុធលើមន្ត្រីគយនៅច្រកទ្វារអន្តរជាតិភ្នំដិន កាលពីប៉ុន្មានថ្ងៃមុន និងបានបង្កការភ្ញាក់ផ្អើលទាំងយប់ដល់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដីកាបង្គាប់ឲ្យឃុំខ្លួនចេញដោយ លោក គុជ តារ៉ា ចៅក្រមស៊ើបសួរសាលាដំបូងខេត្តតាកែវ បង្ហាញថា ឈ្មោះ ណុប សំបូរ ភេទប្រុស អាយុ ៣១ ឆ្នាំ ជនជាតិខ្មែរ មុខរបរជាមន្ត្រីនគរបាលជាតិ នៃស្នងការដ្ឋាននគរបាលខេត្តតាកែវ ទីលំនៅបច្ចុប្បន្នភូមិកំពង់អំពិល ឃុំបូរីជលសារ ស្រុកបូរីជលសារ ខេត្តតាកែវ ត្រូវបានដាក់ឲ្យស្ថិតនៅក្រោមការពិនិត្យ ពីបទ ៖ ចាត់វិធានការសំដៅរារាំងការអនុវត្តច្បាប់ និងស្ថានទម្ងន់ទោស, បទប្រឆាំងនឹងអ្នករាជការសាធារណៈមានស្ថានទម្ងន់ទោស, បទកាន់កាប់ប្រើប្រាស់អាវុធដោយគ្មានការអនុញ្ញាត និងបទបង្កឧបសគ្គ ឬធ្វើឲ្យរាំងស្ទះដល់ការអនុវត្តច្បាប់របស់មន្ត្រីគយ ប្រព្រឹត្តនៅចំណុចភូមិបន្ទាយ ឃុំជីខ្មា ស្រុកទ្រាំង ខេត្តតាកែវ កាលពីយប់ថ្ងៃទី ០១ ខែកក្កដា ឆ្នាំ ២០២៣។ ដីកានេះ បានសម្រេចឃុំខ្លួនជាបណ្ដោះអាសន្នលេខ ៥១២ / ២០២៣ ចុះថ្ងៃទី ០៥ ខែកក្កដា ឆ្នាំ ២០២៣ នៅពន្ធនាគារខេត្តតាកែវ។

សូមរំឭកថា កាលពីយប់ថ្ងៃទី ០១ ខែកក្កដា ឆ្នាំ ២០២៣ ឈ្មោះ ណុប សំបូរ ជាមន្ត្រីប៉ូលិសសេដ្ឋកិច្ចប្រចាំការនៅច្រកទ្វារអន្តរជាតិភ្នំដិន ស្រុកគីរីវង់ បានបង្កការផ្ទុះអាវុធ ចំពេលមន្ត្រីគយចល័តកំពុងបំពេញការងារ ដែលមហាជនមើលឃើញថា ជាករណីកាងរថយន្តដឹកទំនិញ ហើយមិនព្រមបង់ពន្ធទៅគយចល័ត ទើបកើតមានជម្លោះនឹងគ្នា រហូតមានការផ្ទុះអាវុធបែបនេះទៅ៕

អត្ថបទ ៖ វីរៈ