លោក Macron អាចនឹងបញ្ជាឲ្យបិទ TikTok, Snapchat និង Twitter បើកុបកម្មនៅ បារាំង កាន់តែអាក្រក់ទៅៗ

ប្រធានាធិបតីបារាំង លោក Emmanuel Macron បាននិយាយកាលពីថ្ងៃពុធថា អាជ្ញាធរបារាំងអាចបិទបណ្តាញសង្គមដូចជា TikTok, Snapchat និង Twitter ប្រសិនបើស្ថានភាពចលាចលនៅក្នុងប្រទេសកាន់តែយ៉ាប់យ៉ឺនទៅៗ ។

លោក Macron បានប្រាប់ទូរទស្សន៍បារាំង BFMTV ថា “យើងត្រូវគិតអំពីបញ្ហាប្រព័ន្ធផ្សព្វផ្សាយសង្គម និងការហាមប្រាមដែលអាចអនុវត្តបាន ហើយប្រសិនបើស្ថានការណ៍កាន់តែអាក្រក់ទៅៗ យើងប្រហែលជាអាចធ្វើការគ្រប់គ្រង និងបិទប្រព័ន្ធផ្សព្វផ្សាយទាំងនេះតែម្ដង” ។

ទន្ទឹមនោះ លោក Macron ធ្លាប់បានលើកឡើងហើយកាលពីថ្ងៃសុក្រសប្ដាហ៍មុនថា អាជ្ញាធរបារាំងនឹងកំណត់អត្តសញ្ញាណអ្នកដែលអំពាវនាវឲ្យមានការតវ៉ាតាមរយៈប្រព័ន្ធផ្សព្វផ្សាយសង្គម ខណៈភាពចលាចលនៅតែកំពុងបន្តកើតមាន បន្ទាប់ពីការស្លាប់របស់ក្មេងជំទង់ម្នាក់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងបញ្ហានេះដែរ រដ្ឋមន្ត្រីក្រសួងមហាផ្ទៃលោក Gerald Darmanin និងរដ្ឋមន្ត្រីឌីជីថល និងទូរគមនាគមន៍ លោក Jean-Noel Barrot តាមសេចក្តីរាយការណ៍បានព្រមានវេទិកានានាដូចជា TikTok, Snapchat និង Twitter អំពីការទទួលខុសត្រូវរបស់ពួកគេ ហើយបានស្នើសុំការគាំទ្រក្នុងការកំណត់អត្តសញ្ញាណអ្នកប្រើប្រាស់ដែលពាក់ព័ន្ធនឹងការប្រព្រឹត្តបទល្មើសនេះផងដែរ ។

គួរបញ្ជាក់ថា ប្រទេសបារាំងបានទទួលរងនូវភាពចលាចល ចាប់តាំងពីថ្ងៃទី២៧ ខែមិថុនា នៅពេលដែលយុវជនឈ្មោះ Nahel វ័យ ១៧ ឆ្នាំត្រូវប៉ូលិសបាញ់សម្លាប់ បន្ទាប់ពីមិនគោរពច្បាប់ចរាចរណ៍នៅទីក្រុង Nanterre ជាយក្រុងប៉ារីស ខណៈមន្ត្រីប៉ូលិសដែលប្រព្រឹត្តទង្វើរនេះក៏ត្រូវបានចាប់ខ្លួនផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ្នកលេងបណ្ដាញសង្គម បារាំង យករូបភាពបាតុកម្មក្នុងខ្សែភាពយន្តបង្ហោះ បង្កភាពវឹកវរតាមអ៊ីនធឺណិត