កាណាដា បញ្ឈប់ការផ្សាយពាណិជ្ជកម្មលើ Facebook និង​ Instagram

រដ្ឋមន្ត្រីបេតិកភណ្ឌកាណាដាលោក Pablo Rodriguez ប្រកាសថា រដ្ឋាភិបាលកាណាដានឹងបញ្ឈប់ការទិញសិទ្ធផ្សាយពាណិជ្ជកម្មនៅលើបណ្ដាញសង្គម Facebook និង Instagram ចំពេលកំពុងមានជម្លោះដែលពាក់់ព័ន្ធជាមួយច្បាប់ថ្មី ដែលជំរុញឲ្យក្រុមហ៊ុន Meta និង Google ត្រូវចែកភាគលាភខ្លះដល់ប្រព័ន្ធផ្សព្វផ្សាយព័ត៌មានតាមអនឡាញ ។

ការបញ្ឈប់ផ្សាយពាណិជ្ជកម្មនេះ ពាក់ព័ន្ធជាមួយច្បាប់ថ្មីរបស់កាណាដា ដែលតម្រូវឲ្យក្រុមហ៊ុន Meta រួមជាមួយ Google ​ត្រូវតែចែកភាគលាភមួយចំនួន​ទៅដល់សារព័ត៌មានក្នុងស្រុកដែលបានខាតបង់ចំណូលនៅក្នុងឆ្នាំ ២០២២ ប៉ុន្តែក្រុមហ៊ុនទាំងពីរ បានបដិសេដមិនយល់ស្របជាមួយច្បាប់ថ្មីនេះឡើយ ។

ទន្ទឹមនោះ Meta ធ្លាប់បានលើកឡើងថា ព័ត៌មាន គឺមិនមានតម្លៃសេដ្ឋកិច្ចសម្រាប់ក្រុមហ៊ុននោះទេ ប៉ុន្តែមានតែស្ថាប័នព័ត៌មានវិញទេ ដែលទទួលបានអត្ថប្រយោជន៍ពីការចែករំលែកព័ត៌មានផ្សេងៗរបស់ពួកគេនៅលើវេទិកា Facebook ។

​ពាក់ព័ន្ធនឹងការបិទផ្សាយពាណិជ្ជកម្មនេះដែរ នឹងធ្វើឲ្យ Facebook និង Instagram ខាតបង់ប្រាក់ប្រហែល ៧.៥ លានដុល្លារក្នុងមួយឆ្នាំពីរដ្ឋាភិបាលកាណាដា ខណៈនៅក្នុងឆ្នាំ ២០២២ Google រួមជាមួយ​ Facebook រកចំណូលបានជាង ៧.៥ ពាន់លានដុល្លារ ពីការផ្សព្វផ្សាយពាណិជ្ជកម្មសរុបនៅទូទាំងកាណាដា ៕

ប្រែសម្រួល៖ នាង រតនៈ

ប្រភព៖ Al Jazeera

ចុចអាន៖ Meta បញ្ចេញ App ថ្មីជាផ្លូវការ ដើម្បីប្រជែង ជាមួយ Twitter