ព័ត៌មានជាតិ

រាជរដ្ឋាភិបាល នឹងផ្ដល់ប្រាក់អត្ថប្រយោជន៍បន្ថែមជូនកម្មការិនីមានផ្ទៃពោះ និងកុមារក្រោមអាយុ ២ ឆ្នាំ ចាប់ពីខែសីហា តទៅ

បានផុស

៣ years មុន

នៅ

ថ្ងៃពុធ ២៦ កក្កដា ២០២៣

ដោយ

រាជរដ្ឋាភិបាល នឹងផ្ដល់ប្រាក់អត្ថប្រយោជន៍បន្ថែមពីកម្មវិធីឧបត្ថម្ភសាច់ប្រាក់ជូនកម្មការិនីមានផ្ទៃពោះ និងកុមារ ក្រោមអាយុ ២ ឆ្នាំ ចាប់ពីខែសីហា ឆ្នាំ ២០២៣ ខាងមុខតទៅ ដើម្បីចូលរួមលើកកម្ពស់សុខុមាលភាព និងជីវភាពរស់នៅរបស់កម្មករនិយោជិត ក៏ដូចជារួមចំណែកដោះស្រាយនូវទុក្ខលំបាកការខ្វះខាតក្នុងអំឡុងពេលសម្រាលមាតុភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងកាលពីពេលថ្មីៗនេះថា ការសម្រេចផ្ដល់អត្ថប្រយោជន៍បន្ថែមពីកម្មវិធីឧបត្ថម្ភសាច់ប្រាក់ជូនកម្មករនិយោជិតស្ត្រីមានផ្ទៃពោះ និងកុមារ ក្រោមអាយុ ២ ឆ្នាំ ចាប់ពីខែសីហា ឆ្នាំ ២០២៣ បន្ទាប់ពីប្រមុខរដ្ឋាភិបាលកម្ពុជា បានប្រកាសកាលពីថ្ងៃទី ២២ ខែឧសភា ឆ្នាំ ២០២៣ កន្លងទៅ ក្នុងនោះមុនពេលសម្រាលកូន កម្មករនិយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។

លោករដ្ឋមន្ត្រី បានបន្តថា ពេលសម្រាលកូន កម្មករនិយោជិតស្ត្រីមានផ្ទៃពោះ ទទួលបានប្រាក់ឧបត្ថម្ភ ដោយកូនចំនួន ១ ទទួលបានថវិកា ៨០ ម៉ឺនរៀល កូនភ្លោះ ២ ទទួលបាន ១ លាន ២ សែនរៀល និងកូនភ្លោះ ៣ ទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។

លោករដ្ឋមន្ត្រី បានបន្តទៀតថា ក្រោយពេលសម្រាលកូន កម្មករនិយោជិតស្ត្រីមានផ្ទៃពោះ ទទួលបានប្រាក់ឧបត្ថម្ភចំនួន ១០ លើក ដោយ ១ លើក ទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាពក្រោយពេលសម្រាលកូន និង ៧ លើកទៀត ពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ។

គួររំលឹកឲ្យដឹងថា បច្ចុប្បន្ននេះ ស្ត្រីជាកម្មការិនីសម្រាលកូនបានកូន ១ ទទួលបានប្រាក់ឧបត្ថម្ភចំនួន ៤០ ម៉ឺនរៀល សម្រាលបានកូនភ្លោះ ២ ទទួលបាន ៨០ ម៉ឺនរៀល និងសម្រាលបានកូនភ្លោះ ៣ ទទួលបានប្រាក់ឧបត្ថម្ភចំនួន ១ លាន ២ សែនរៀល និងទទួលបានប្រាក់ឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ៕

អត្ថបទ ៖ សំអឿន