ព័ត៌មានជាតិ

ឯកឧត្ដម ហ៊ុន ម៉ានី ៖ មិនថា កម្ពុជា ឬ ប្រទេសណាក៏ដោយ បើចង់ឲ្យគេស្គាល់ ត្រូវធ្វើសកម្មភាពជាក់លាក់ ប្រឹងប្រែងឲ្យជោគជ័យ

បានផុស

៣ years មុន

នៅ

ថ្ងៃអាទិត្យ ៣០ កក្កដា ២០២៣

ដោយ

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានប្រតិភូកីឡាក្នុងព្រឹត្តិការណ៍អាស៊ានប៉ារ៉ាហ្គេម លើកទី ១២ លើកឡើងថា មិនថា កម្ពុជា ឬ ប្រទេសណាក៏ដោយ បើសិនចង់ឲ្យគេស្គាល់ ពិតណាស់ត្រូវធ្វើសកម្មភាពជាក់លាក់ ប្រឹងប្រែងឲ្យជោគជ័យ ទើបធ្វើឲ្យគេស្ញប់ស្ញែង និងកោតសរសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ខណៈដែល ឯកឧត្ដម ហ៊ុន ម៉ានី បានអញ្ជើញចូលរួមក្នុងពិធីអាហារសាមគ្គីជាមួយអ្នកស្ម័គ្រចិត្តបង្គោលក្នុងព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ កាលពីល្ងាចថ្ងៃទី ២៩ ខែកក្កដា ឆ្នាំ ២០២៣។

ឯកឧត្ដម ហ៊ុន ម៉ានី បានលើកឡើងថា «មិនថាប្រទេសកម្ពុជា ឬ ប្រទេសណាក៏ដោយ បើសិនចង់ឲ្យគេស្គាល់ ពិតណាស់ គឺត្រូវធ្វើសកម្មភាពជាក់លាក់ ហើយប្រឹងប្រែងឲ្យបានជោគជ័យ ទើបធ្វើឲ្យគេស្ញប់ស្ញែង និងកោតសរសើរបាន ដោយជាក់ស្ដែង ព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម បានធ្វើឲ្យគេស្គាល់កម្ពុជាបច្ចុប្បន្ន ហើយសក្ដានុពល និងមុខមាត់នេះ គឺបានឆ្លុះបញ្ចាំងពីសមត្ថភាពរបស់ប្រជាជនយើងយ៉ាងពិតប្រាកដ»។

ផ្សារភ្ជាប់ការលើកឡើងនេះ ឯកឧត្ដម ហ៊ុន ម៉ានី គូសបញ្ជាក់ថា ដើម្បីយល់ពីគុណតម្លៃ និងសារៈសំខាន់ នៃការរៀបចំព្រឹត្តិការណ៍ប្រវត្តិសាស្ត្រទាំងពីរនេះ ចំពោះព្រះរាជាណាចក្រកម្ពុជា គឺយើងត្រូវវិភាគ និងដកពិសោធ ទើបដឹងថា យើងពិតជាមានមោទនភាពប៉ុណ្ណា។

ឯកឧត្ដម ហ៊ុន ម៉ានី បន្ថែមថា «តាមរយៈការងារកន្លងទៅ ប្អូនៗ គឺបានហ្វឹកហាត់ និងលត់ដំសមត្ថភាពខ្លួនឯង និងទទួលបទពិសោធន៍ពីការងារដឹកនាំផងដែរ»។ ជាមួយនេះ ឯកឧត្ដម ក៏បានលើកទឹកចិត្តឲ្យយុវជនស្ម័គ្រចិត្តទាំងអស់ ខិតខំប្រឹងប្រែងចាប់យកក្ដីស្រមៃរៀងៗ ខ្លួន ដោយមានគោលដៅរួម ក្នុងការថែរក្សាសុខសន្តិភាព និងជឿជាក់លើសង្គមជាតិតែមួយ។

នាឱកាសនោះដែរ ឯកឧត្ដម ហ៊ុន ម៉ានី ក៏បានថ្លែងអំណរគុណ និងកោតសរសើរចំពោះយុវជនស្ម័គ្រចិត្តទាំងអស់ ដែលខិតខំប្រឹងប្រែង ដាក់ចិត្ត ដាក់បេះដូង ក្នុងការងារ និងជួយយកអាសាគ្នា ហើយទាំងនេះគឺពិតជាលើសពីការចាត់តាំង៕

អត្ថបទ ៖ ពិសី

Related Topics:ឯកឧត្ដម ហ៊ុន ម៉ានី