អ្នកស្លាប់ដោយសារភ្លើងឆេះព្រៃនៅហាវ៉ៃ កើនដល់ ៨០ នាក់ និងបំផ្លាញសំណង់ជាង ២,២០០

អាជ្ញាធរបានបញ្ជាក់ពីអ្នកស្លាប់យ៉ាងតិច ៨០ នាក់នៅក្នុងភ្លើងឆេះព្រៃនៅកោះ Maui  នៃរដ្ឋហាវ៉ៃ ដែល​បំផ្លិចបំផ្លាញសំណង់ជាង២,២០០ ខណៈវាបានផ្ទុះឡើងកាល​ពី​ថ្ងៃ​អង្គារ ទី0៨ ខែសីហា។

ភ្លើង​ឆេះ​ព្រៃ​ដ៏​សន្ធោសន្ធៅ​ បានរាលដាលយ៉ាងខ្លាំងដោយសារតែខ្យល់​ព្យុះ​សង្ឃរា ​Dora ដោយ​បំផ្លិចបំផ្លាញ​ទីក្រុង​ប្រវត្តិសាស្ត្រ Lahaina លើ​កោះ Maui ដែលជាតំបន់ទីក្រុងសំខាន់ រហូតក្លាយជាផេះមួយពព្រិចភ្នែកប៉ុណ្ណោះ។

ទោះយ៉ាងណាក៏ដោយ អាជ្ញាធរក្នុងតំបន់បានប្រកាសថា មនុស្សជាង ១,៤០០ នាក់បានជ្រកកោននៅក្នុងវិទ្យាល័យ និង​ព្រះវិហារ គិតត្រឹមថ្ងៃសុក្រ ដោយមានទឹក​និង​អាហារ​ត្រូវ​បាន​គេ​ចែក​ជូន​ពួក​គេ។

ស្របពេលដែលមជ្ឈមណ្ឌលគ្រោះមហន្តរាយប៉ាស៊ីហ្វិកកាលពីថ្ងៃសៅរ៍ បានចេញផ្សាយការវាយតម្លៃនៃការខូចខាត​នៅ Lahaina ដោយ​និយាយថា​ប្រហែល ៨,៨ លានម៉ែត្រការ៉េឬប្រហែល ២,១៧០ ហិចតា​ត្រូវបាន​ដុត​ ហើយ​ថា ៨៦ ភាគរយនៃអគារដែល​រងផល​ប៉ះពាល់គឺ​ជា​លំនៅដ្ឋាន​ ដែលបណ្តាលឲ្យ​ត្រូវការ​ជម្រក​សម្រាប់​មនុស្ស ៤,៥០០នាក់ឯណោះ។

លើសពីនេះទៀតដែរ សំណង់​សរុបចំនួន ២,២០៧ បានខូចខាតឬបំផ្លាញខ្ទិចគ្មានសល់ ហើយរដ្ឋាភិបាល​ត្រូវការទឹកប្រាក់ក្នុងទំហំប្រហែល ៥.៥២ ពាន់លានដុល្លារ ដើម្បីសាងសង់ឡើងវិញនូវអ្វីដែលបានបាត់បង់ពីភ្លើងឆេះព្រៃដ៏សាហាវក្នុងប្រវត្តិសាស្ត្រ៕

ប្រែសម្រួល៖ សាង ស្រីល័ក្ខ

ប្រភព៖NHK

ចុចអាន៖វីដេអូរន្ធត់ បង្ហាញឲ្យឃើញ មនុស្សនាំគ្នាចុះទឹក ដើម្បីគេចពីភ្លើងឆេះព្រៃដ៏សាហាវ នៅ ហាវ៉ៃ