បើឃើញមានការនាំចូល ឬចិញ្ចឹមប្រភេទត្រីកាចសាហាវ ត្រូវរាយការណ៍ទៅសមត្ថកិច្ចជំនាញជលផល

ចំពោះអ្នកដែលកំពុងចិញ្ចឹម «ត្រីពីរ៉ាន់ញ៉ា» ឬ ប្រភេទត្រីស៊ីសាច់ជាអាហារ ដែលអាចផលប៉ះពាល់ដល់ប្រភេទត្រីធម្មជាតិ ក៏ដូចមនុស្ស សត្វ និងបរិស្ថានឡើយ ដាច់ខាតមិនត្រូវលែងត្រីប្រភេទនេះចូលប្រភពទឹកធម្មជាតិឡើយ គឺត្រូវប្រគល់ឱ្យរដ្ឋបាលជលផលជាកំហិត។ នេះបើតាមសេចក្តីប្រកាសរបស់ ក្រសួងកសិកម្ម រុក្ខាប្រមាញ់ និងនេសាទ ថ្ងៃទី១៣ ខែសីហា ឆ្នាំ២០២៣ ។

ថ្មីៗនេះ មានការផ្សព្វផ្សាយនិងចែករំលែកតៗគ្នា នៅលើបណ្តាញទំនាក់ទំនងសង្គម TikTok និងហ្វេសប៊ុក អំពីការនាំចូល និងលក់ចែកចាយប្រភេទត្រីពីរ៉ាន់ញ៉ា (Piranha) ដែលគេស្គាល់ថា ជាប្រភេទត្រីដែលមានលក្ខណៈកាចសាហាវ ស៊ីសាច់ជាអាហារ ធ្វើឱ្យសាធារណជនព្រួយបារម្ភ ថាអាចមានការលែងត្រីទាំងនោះ ចូលប្រភពទឹកធម្មជាតិ។​

ជុំវិញករណីនេះ ក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា ករណីនៃការនាំចូលប្រភេទត្រីសាហាវ «ត្រីពីរ៉ាន់ញ៉ា» ដែលបង្កឱ្យមានភ្ញាក់ផ្អើលដល់សាធារណជននោះ រដ្ឋបាលជលផល បានចុះទៅពិនិត្យ និងអនុវត្តច្បាប់ដល់កន្លែង នៅថ្ងៃទី​០៦ ខែសីហា ឆ្នាំ២០២៣ ដោយម្ចាស់អាជីវកម្ម បានធ្វើកិច្ចសន្យាឈប់នាំចូល និងឯកភាពបំផ្លាញត្រីទាំងនោះរួចរាល់ហើយដែរ។

ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ អំពាវនាវ​​ដល់សាធារណជនទាំងអស់ ត្រូវរាយការណ៍ដល់សមត្ថកិច្ចជំនាញជលផល ប្រសិនជាបានដឹងអំពីការនាំត្រីពីរ៉ាន់ញ៉ា ឬប្រភេទត្រីកាចសាហាវផ្សេងទៀត យកមកចិញ្ចឹម ឬចិញ្ចឹមលម្អក៏ដោយ ដើម្បីឱ្យអាជ្ញាធរពាក់ព័ន្ធចាត់វិធានការសមស្រប។ សម្រាប់លេខទំនាក់ទំនងសមត្ថកិច្ចជំនាញជលផល ០១២ ៩១១ ៤១១ ឬ ០១២ ៩២៩ ២២៩ ។

​​​គួរបញ្ជាក់ថា ត្រី​​ពីរ៉ាន់ញ៉ា​​ មាន​មាឌ​តូច តែ​មាន​ធ្មេញ​ស្រួច រឹង​ ហើយស៊ីសាច់ជាអាហារ ដូច្នេះដាច់ខាតមិនត្រូវលែងត្រីប្រភេទនេះចូលក្នុងប្រភពទឹកធម្មជាតិឡើយ៕

អត្ថបទដោយ៖ សុធាវី

ចុចអានដើម្បីស្វែងយល់៖ ៥ចំណុចគួរឲ្យខ្លាច ពីត្រីស៊ីសាច់ជាអាហារ Piranha