នគរបាលខេត្តព្រះសីហនុកំពុងតាមចាប់ខ្លួនជនសង្ស័យបន្ថែមពាក់ព័ន្ធករណីផ្ទុះអាវុធ​ ខណៈ​៣​នាក់ត្រូវបានចាប់ខ្លួន

កម្លាំងនគរបាលនៃស្នងការដ្ឋាននគរបាលខេត្តព្រះសីហនុ​ បានបង្ក្រាប និងឃាត់ខ្លួនជនសង្ស័យចំនួន៣នាក់ ពាក់ព័ន្ធករណីផ្ទុះអាវុធនៅចំណុចរង្វង់មូលតោពីរ ខណៈអ្នកពាក់ព័ន្ធមួយចំនួនទៀតកំពុងគេចខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពព័ត៌មានមួយបានឲ្យដឹងថា គិតត្រឹមម៉ោងជាង១២ថ្ងៃត្រង់ទី២២សីហានេះ សមត្ថកិច្ចបង្ក្រាបបានជនសង្ស័យ​ពាក់ពន្ធ័ចំនួន៣នាក់ និងដកហូតបានសម្ភារៈវត្ថុតាងមួយចំនួន និងកំពុងបន្តប្រតិបត្តិការតាមចាប់ខ្លួនអ្នកពាក់ព័ន្ធមួយចំនួនទៀត ដែលព្យាយាមបើករថយន្តរត់គេចខ្លួន។ ទោះបីយ៉ាងណាកម្លាំងនគរបាលនៅមិនទាន់បញ្ជាក់ពីអត្តសញ្ញាណ​ក្រុមជនសង្ស័យ និងដើមហេតុយ៉ាងណានោះទេ ដោយរង់ចាំការសាកសួរតាមនិតិវិធី ប៉ុន្តែបើតាមប្រភពក្រៅផ្លូវការខ្លះថា នេះជាករណីជម្លោះរវាងជនជាតិចិន និងជនជាតិចិន។

សូមបញ្ជាក់ថា កាលពីព្រឹកថ្ងៃទី២២ សីហា នេះ មានករណីរថយន្ដស៊េរីទំនើបជាច្រើនគ្រឿងបានបើកប្រដេញគ្នារហូតមានការផ្ទុះអាវុធដាក់គ្នាមនៅចំណុចរង្វង់មូលតោពីរ ក្នុងក្រុងព្រះសីហុន ខេត្តព្រះសីហនុ។ រហូតមកដល់រសៀលថ្ងៃដដែលនេះ កម្លាំងនគរបាលនៃស្នងការដ្ឋាននគរបាលខេត្តព្រះសីហនុ បាននិងកំពុងបន្តស្រាវជ្រាវដើម្បីតាមចាប់ខ្លួនក្រុមទាំងនេះដើម្បីយកមកសួរនាំបន្ថែម៕

អត្ថបទ៖​ សុខុម