មន្ត្រីលោកខាងលិច​ លើកឡើងខុសៗគ្នា អំពីមូលហេតុនៃការធ្លាក់យន្តហោះ របស់មេទាហានស៊ីឈ្នួល រុស្ស៊ី

ការវាយតម្លៃបឋមរបស់ទីភ្នាក់ងារស៊ើបការណ៍សម្ងាត់អាមេរិក បានរកឃើញថាការ ធ្លាក់យន្តហោះរបស់មេទាហានស៊ីឈ្នួលរុស្ស៊ី គឺបណ្តាលមកពីការផ្ទុះដោយចេតនា ប៉ុន្តែមន្ទីរបញ្ចកោណនិយាយថា មកទល់ពេលនេះ មិនទាន់មានព័ស្តុតាងណាដែលចង្អុលបង្ហាញថា យន្តហោះត្រូវបាញ់ដោយមីស៊ីលនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ ឧត្តមសេនីយឯក Patrick Ryder អ្នកនាំពាក្យមន្ទីរបញ្ចកោណ ក៏មិនបានផ្តល់ព័ត៌មានលម្អិត ឬព័ស្តុតាងអ្វីបន្ថែមដែរ អំឡុងពេលលោកថ្លែងក្នុងសន្និសីទសារព័ត៌មាន។

ដោយឡែក មន្ត្រីលោកខាងលិចផ្សេងទៀត បានចង្អុលទៅគ្រាប់បែកដែលគេបង្កៃក្នុងយន្តហោះ ឬការធ្វើអ្វីផ្សេងជាមួយចេតនាកម្ទេចយន្តហោះនេះ ថាជាដើមហេតុ។

ទោះបីជាយ៉ាងណាក៏ដោយ​ មិនទាន់មានប្រភពច្បាស់ការណ៍ណាមួយបញ្ជាក់ថា លោក Prigozhin និងមន្ត្រីជាន់ខ្ពស់ជាច្រើននាក់របស់គាត់ ពិតជាស្លាប់មែនឬក៏អត់ ហើយថាតើនេះគឺជាការសងសឹកចំពោះការបះបោររបស់គាត់ប្រឆាំងនឹងលោក ពូទីន មែនឬអត់នោះទេ។

គួរបញ្ជាក់ជាថ្មី លោក Yevgeny Prigozhin មេទាហានស៊ីឈ្នួលរុស្ស៊ី Wagner ត្រូវបានគេជឿថា ស្លាប់ក្នុងហេតុការណ៍ធ្លាក់យន្តហោះ Embraer Legacy 600 មានលេខកន្ទុយ RA-02795 នៅក្នុងប្រទេសរុស្ស៊ី កាលពីថ្ងៃពុធ ទី២៣ ខែសីហា។

យោងតាមទីភ្នាក់ងារដឹកជញ្ជូនផ្លូវអាកាសសហព័ន្ធរបស់ប្រទេសរុស្ស៊ី Rosaviatsiya, ក្នុងយន្តហោះនោះមានផ្ទុកមនុស្ស១០នាក់ ពោលគឺអាកាសយានិក៣នាក់ និងអ្នកដំណើរ៧នាក់ ហើយពេលនេះ សាកសពត្រូវបានរកឃើញអស់ហើយ។

មន្ត្រីជាន់ខ្ពស់បំផុតបន្ទាប់ពីលោក Prigozhin ដែលជិះក្នុងយន្តហោះនោះ គឺជាមេបញ្ជាការជាន់ខ្ពស់ក្រុមហ៊ុនទាហានស៊ីឈ្នួល Wagner ឈ្មោះ Dmitry Utkin៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ទីបំផុត លោក ពូទីន ចេញមុខនិយាយហើយ ក្រោយការធ្លាក់យន្តហោះរបស់មេទាហានស៊ីឈ្នួល