ព័ត៌មានជាតិ

អ្នកឧកញ៉ា លឹម ហេង ៖ ការនាំចូលទំនិញខុសច្បាប់គ្មានគុណភាពជាការបំផ្លាញ SME និងផលិតផលក្នុងស្រុក

បានផុស

៣ years មុន

នៅ

ថ្ងៃព្រហស្បតិ៍ ៣១ សីហា ២០២៣

ដោយ

ការហូរចូលទំនិញពីបរទេស ដោយមិនមានច្បាប់អនុញ្ញាត និងការត្រួតពិនិត្យឱ្យបានត្រឹមត្រូវតាមស្តង់ដារគុណភាព បាននិងកំពុងជះឥទ្ធិពលមិនល្អដល់វិស័យសហគ្រាសធុនតូច និងមធ្យម(SME) នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា លឹម ហេង អនុប្រធានសភាភាពាណិជ្ជកម្មកម្ពុជា បានលើកឡើងថា ដើម្បីលើកតម្កើងផលិតផលក្នុងស្រុក ជាពិសេសវិស័យ SME ឱ្យមានដំណើរការល្អ ត្រូវទប់ស្កាត់ឱ្យបាននូវការនាំចូលទំនិញខុសច្បាប់។

បើតាមអ្នកឧកញ៉ា លឹម ហេង ប្រទេសនៅក្នុងសហគមន៍សេដ្ឋកិច្ចអាស៊ាន ឬនៅក្នុងអង្គការពាណិជ្ជកម្មពិភពលោក ត្រូវតែធ្វើពាណិជ្ជកម្មនាំចេញនាំចូល ប៉ុន្តែអ្វីដែលកម្ពុជា ចង់បានគឺការប្រកួតប្រជែងដោយមានតម្លាភាព ដើម្បីឱ្យសហគ្រាសធុនតូច និងមធ្យមក្នុងស្រុកអាចរស់បាន។ ដើម្បីឱ្យ SME អាចរស់បាន ត្រូវរឹតបន្តឹងច្បាប់ស្តីពីការនាំចេញនាំចូលឱ្យអនុលោមតាមច្បាប់ ជៀសវាងការគេចវេសធ្វើឱ្យប៉ះពាល់ដល់ផលិតផលក្នុងស្រុក។ មួយវិញទៀត ប្រសិនបើផលិតផលនាំចូលទាំងនោះ ពុំមានការពិនិត្យស្តង់ដារគុណភាពឱ្យបានត្រឹមត្រូវទេ នោះនឹងប៉ះពាល់ដល់សុខភាពអ្នកប្រើប្រាស់ផងដែរ។

អ្នកឧកញ៉ាបន្តដូច្នេះថា« ការនាំចូលទំនិញដែលខុសច្បាប់ អត់គុណភាព ឬមានគុណភាពក៏ដោយ គឺនឹងប៉ះពាល់ដល់អ្នកផលិតក្នុងស្រុក ដូច្នេះទាមទារចាំបាច់នូវការរឹតបន្តឹងអនុវត្តច្បាប់នាំចូលឱ្យមានប្រសិទ្ធភាព ជៀសវាងការប្រកួតប្រជែងដោយមិនស្មើភាពគ្នា»។

ឧកញ៉ា នឹម វណ្ណៈ អ្នកជំនួញក្តោបក្តាប់អាជីវកម្មជាច្រើនក្នុងដៃ បានលើកឡើងតាមរយៈបណ្តាញសង្គមហ្វេសប៊ុកផ្លូវការថា ការនាំចូលសាច់ពីខាងក្រៅធ្វើឱ្យកសិករកាន់តែលំបាក។ ឧកញ៉ាបន្តដូច្នេះថា« ក្រសួងកសិកម្ម “ កសិផលបានតម្លៃខ្ពស់ មិនមែនជាអ្វីដែលយើងចង់បានទេ អ្វីដែលចង់បានគឺថ្លៃលើការផលិតទាប “។ ចង់បានថ្លៃលើការផលិតទាប យ៉ាងមិច?? បើ ជី សាំង អគ្គិសនី គឺយើងមិនអាចគ្រប់គ្រងបានឡើយ តែអ្វីដែលក្រសួងអាចធ្វើបានគឺទប់ស្កាត់ការនាំចូលគេចពន្ធនានា ដើម្បីផ្តល់លទ្ធភាពដល់កសិករខ្មែរយើងក្នុងស្រុក»។

វិស័យសហគ្រាសធុនតូច និងមធ្យម (SME) ដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា។ ក្នុងចំណោម SME ជាង ៩០ភាគរយ បានចូលរួមចំណែកប្រហែល ៦០ភាគរយនៃផលិតផលក្នុងស្រុកសរុប (GDP) និងបង្កើតការងារប្រមាណ ៧០ភាគរយ នៃសេដ្ឋកិច្ចជាតិ។

សហគ្រាសធុនតូច និងមធ្យម (SME) នៅតែត្រូវបានចាត់ទុកថា ជាផ្នែកដ៏សំខាន់ក្នុងការជំរុញកំណើនវិស័យឧស្សាហកម្មកម្ពុជា ដែលនឹងជួយឲ្យរដ្ឋាភិបាលអាចសម្រេចបានផែនការប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់ក្នុងឆ្នាំ ២០៣០ និងប្រាក់ចំណូលខ្ពស់ក្នុងឆ្នាំ ២០៥០៕